— नेपालसामु क्रिकेट विश्वकप लिग २ को निराशाजनक पहिलो शृंखलालाई जितका साथ टुंग्याउने राम्रो अवसर छ । त्यसका लागि नेपालले कठिन मानिएको नेदरल्यान्ड्सको चुनौती पन्छाउनुपर्ने हुन्छ ।
नेपाल र नेदरल्यान्ड्स दुवै यस पटक केही फिक्का देखिएका छन् । यी दुई टोलीले समान ३ खेल खेल्दै एकमा मात्र विजय हात पार्न सकेका छन् । जबकि यी दुई टोलीको तुलनामा केही कमजोर मानिएको नामिबियाले ४ मध्ये तीन खेल जितेर लिग २ मा सानदार सुरुआत गरेको छ । नामिबियाले शुक्रबार नेदरल्यान्ड्सलाई २४ रनले हराएको थियो ।
नेपाली भूमिमा आएको नतिजाबाट नेदरल्यान्ड्सका प्रशिक्षक रायन कुक आश्चर्यचकित छैनन् । ‘यो निकै प्रतिस्पर्धात्मक लिग हो, पुनेमा विश्वकपमा इंग्ल्यान्डविरुद्ध ३ सय ४० रनको विजय लक्ष्य पछ्याउन खेलेको खेलेभन्दा यो धेरै फरक लिग हो, यहाँ त्यस्तो हुँदैन,’ नामिबियासँग शुक्रबार हारेपछि कुकले भनेका थिए, ‘हामी यस्तो कन्डिसनमा भिज्न सक्नुपर्छ । केही खेलाडीले पहिलो पटक खेल्ने मौका पाएका छन्, उनीहरूका लागि यो राम्रो अनुभव हुनेछ ।’
नेपालविरुद्ध २ अंकका लागि खेल्ने तर नेपाललाई उसैको भूमिमा पराजित गर्न यो भन्दा राम्रो क्रिकेट खेल्नुपर्ने कुकको तर्क थियो । नेपालविरुद्ध लिग २ को पहिलो खेलमा नेदरल्यान्ड्स ३९ ओभरमा १ सय ३७ रनमा अलआउट भएको थियो । नेपालले १५.२ ओभरमै १ विकेट गुमाई १ सय ४१ रन बनाएको थियो ।
नेपालसामु नामिबियाविरुद्धको खेल बिर्सेर नेदरल्यान्ड्ससँगकै खेलशैली निरन्तरता दिनुपर्ने चुनौती हुनेछ । ब्याटिङमा बढी नै केन्द्रित हुँदा पनि नेपालले ब्याटिङमै संघर्ष गर्नुपरेको छ । १० जनासम्म राम्रो ब्याटिङ गर्ने क्षमताका खेलाडी खेलाएको नेपाल यसअघि नामिबियासँगको दुई खेलमा क्रमशः १ सय ३२ र १ सय ६८ रनमा अलआउट भएको थियो ।
ब्याटिङलाइन तल्लोक्रमसम्म तन्काउँदा कप्तान रोहित पौडेल र कुशल भुर्तेल आफैं बलिङ गर्नुपरिरहेको छ, यसले उनीहरूको ब्याटिङ प्रभावित पारेको छ । तर, नेपाली टोली अन्तिम खेल अगाडि ठूलो परिवर्तन गर्न चाहँदैन । मध्यक्रमका ब्याटर आरिफ शेख र देव्रेहाते स्पिनर सूर्य तामाङलाई यस शृंखलामा खेलाइएको छैन । अनिल शाह र देव खनालले माथिल्लोक्रममा ब्याटिङ गर्दै आएका छन् ।
