। नेपाली क्रिकेट टिमका मुख्य प्रशिक्षक मोन्टी देसाईले घरेलु मैदानमा हार व्यहोर्दा दु:ख लागेको बताएका छन् ।
आईसीसी क्रिकेट विश्वकप लिग २ मा नेपालले घरेलु मैदानमा खेलेका ४ मध्ये ३ खेलमा हार व्यहोरेको छ ।
नेपाल नेदरल्याण्डस र नामिबिया सहभागी सिरिजमा नामिबियाले ३ खेल जितेको छ भने नेदरल्याण्डसले २ खेल जित्यो । नेपालले भने जम्मा एक खेलमात्र जित्यो । आइतबार नेदरल्याण्डससँग ८ विकेटले पराजित भएपछि पत्रकारहरुसँगको कुराकानीमा मुख्य प्रशिक्षक मोन्टीले आगामी खेलहरु भने योजना बनाएर खेल्ने बताए ।
‘घरेलु मैदानमा हार्दा सधैँ दु:ख लाग्छ’, उनले पत्रकारहरुसँग भने, ‘लिग टु साइकल धेरै चुनौतीपूर्ण हुन्छ । योजना बनाउनुपर्छ ।’
नेपालका कप्तान रोहित पौडेलले लिग टुमा नेपालले राम्रो सुरुवात गरे पनि निरन्तरता दिन नसकेको बताए । ‘हामीले गल्तीहरुबाट सिक्नुपर्छ’, उनले भने ।
टस हारेर पहिले ब्याटिङ गरेको नेपाल ३ बल अगावै १७२ रनमा अलआउट भएको थियो । १७३ रनको लक्ष्य नेदरल्याण्ड्सले २ विकेट गुमाएर ३७.५ ओभरमा पूरा गर्यो ।
