— रुपन्देही प्रहरीले भारतबाट नेपालतर्फ अवैध रुपमा भन्सार छली चोरी पैठारी गरी ल्याइएको अवस्थामा १ सय ४० बोरा प्याज बरामद गरेको छ ।
जिल्ला प्रहरी कार्यालयबाट खटिएको टोलीले बुधबार लुम्बिनी सांस्कृतिक नगरपालिका-१ कालिदहबाट १४० बोरा प्याज बरामद गरेको हो । मोटसाइकल र साइकलमा ओसारपसार गरी गोदाम गरिरहेको अवस्थामा (मोटसाइकल र साइकलसहित) अन्दाजी मूल्य. ८ लाख १० हजार बराबरको प्याज बरामद गरिएको रुपन्देही प्रहरीले जनाएको छ ।
प्रहरीका अनुसार बरामद गरिएका चार मोटरसाइकलमध्ये एउटा भारतीय नम्बर प्लेट र तीनवटा नेपाल नम्बर प्लेटका रहेका छन् । त्यस्तै ७ वटा साइकल बरामद गरिएको प्रहरीले जनाएको छ । बरामद गरिएको प्याज, मोटरसाइकल र साइकल आवश्यक कारवाहीका लागि भैरहवा भन्सार कार्यालय बेलहियामा पठाइएको जिल्ला प्रहरी कार्यालय रुपन्देहीका सूचना अधिकारी तथा प्रहरी नायव उपरीक्षक (डीएसपी) मनोहर प्रसाद भट्टले बताए ।
त्यस्तै, प्रहरीले रोहिणी गाउँपालिका–३ धकधईबाट २ लाख बराबरको सामान बरामद गरेको छ । प्रहरीले बरामद गरेको सामानमाफागु पुर्णिमाका लागि प्रयोग हुने पिच्कारी २३० पिस, बच्चाको जुत्ता र चप्पल ३२ जोर, जेन्स जुत्ता १३७ जोर, टिसर्ट ३५ पिस, रंग १९ प्याकेट र बेलुन १५ प्याकेट रहेका छन् ।
