— सरकारी कार्यालय बिहान १० बजेदेखि ५ बजेसम्म मात्रै चल्छन् । सार्वजनिक बिदा र शनिबार बन्द हुन्छन् । तर नेपाल टेलिकम बागलुङले बिहान ७ बजेदेखि बेलुकी ७ बजेसम्मै सेवा संचालनमा ल्याएको छ ।
फागुनको ८ गतेदेखि शनिबार र सार्वजनिक बिदाको दिन बिहान १० बजेदेखि ५ बजेसम्म र कार्यालय खुल्ने दिन बिहानैदेखि बेलुकीसम्म सेवा संचालनमा ल्याएको कार्यालय प्रमुख सन्तोष बरालले बताए ।
विशेषगरी सेवाग्राहीको सिम कार्ड लिने र इन्टरनेट सेवाको काम र मर्मत सेवा जतिबेला पनि पर्ने भएपछि कार्यालयले सार्वजनिक बिदा भनेर कार्यालय बन्द नगर्ने भएको हो । ‘न्युनतम एकजना प्राविधिक र एकजना प्रशासनिक कर्मचारी जुनसुकै बेला कार्यरत हुने गरी खटाइएको छ’ बरालले भने, ‘टेलिफोन र इन्टरनेटको समस्या आएर कोही रोकिनुपर्दैन ।’ जानकारी पाउनासाथ प्राविधिक पुगेर तथा कार्यालयबाट पनि सेवा दिने उनले बताए ।
फाइवर सेवामा अवरोध आउँदा तत्काल सेवा दिन नसकेमा उपभोक्तालाई असर पर्ने भएकोले यो सेवा थालिएको उनको भनाइ छ । ग्राहकको काउन्टर नियमित खुल्दा सेवाग्राहीले पनि सहजै सेवा पाएका छन् । बागलुङ सहित साविकको धौलागिरि क्षेत्रका ४ जिल्लाका अधिकांश स्थानमा ४ जी र बजार क्षेत्रमा फाइवर इन्टरनेट सेवा संचालनमा छ ।
टेलिकमले मर्मतकालागि प्रविधि र उपकरण तथा सामाग्रीहरु उज्यालो छउन्जेल नियमित खटाउने गरेको हो । बागलुङ शाखाले आफ्नो सेवाप्रवाहलाई उपशाखाको रुपमा पर्वत, म्याग्दी र मुस्ताङमा पनि शुरु गरिसकेको छ । यसरी सेवा संचालन गरेकोमा प्रमुख जिल्ला अधिकारी खगेन्द्रप्रसाद रिजालले टेलिकम शाखाका प्रमुख बराल र कार्यालयको टिमको सेवाको प्रशंसा गरेका छन् ।
