— नेपाल राष्ट्र बैंकले साढे २१ अर्ब रुपैयाँ बराबरको ट्रेजरी बिल बिक्रीका लागि बोलकबोल आह्वान गरेको छ । परिपक्व अवधि सकिएका ट्रेजरी बिल पुनः बिक्रीका लागि राष्ट्र बैंकले बोल कबोल आह्वान गरेको हो । सूचनामा २१ अर्ब ५० करोड रुपैयाँ बराबरको ट्रेजरी बिल नविकरण गर्ने उल्लेख छ ।
ट्रेजरी बिलका लागि राष्ट्र बैंकले आइतबार (फागुन २७ गते) दिउँसो ३ बजेसम्म बोलकबोल गर्न आग्रह गरेको छ । फागुन २९ गते मंगलबार ट्रेजरी बिल जारी (वितरण) गरिनेछ । जसअनुसार ८ अर्ब रुपैयाँको २८ दिने, साढे ८ अर्ब रुपैयाँको ९१ दिने, ५ अर्ब रुपैयाँ बराबरको ३ सय ६४ दिने ट्रेजरी बिलका लागि बोलकबोल मागिएको छ ।
पछिल्लो पटकको बोलकबोलमा ३.१७ प्रतिशत भारित औसत ब्याजदर तय भएको छ । बैंक तथा वित्तीय संस्थाले सबैभन्दा बढी ३.२३ प्रतिशत र सबैभन्दा कम ३.०९ प्रतिशत ब्याजदरमा बोलकबोल गरेका थिए ।
राष्ट्र बैंकले यसअघि आन्तरिक ऋण संकलन गरेकोमध्ये परिपक्व अवधि पुगेका ट्रेजरी बिल पुनः विक्री गरिरहेको छ । सोही क्रममा सरकारले केही ट्रेजरी बिलको पैसा भुक्तानी गरेको छ भने केहीको पुनः बिक्री गर्दै आएको छ ।
