— नवनियुक्त युवा तथा खेलकुदमन्त्री विराजभक्त श्रेष्ठले सम्भावनाका आधारमा खेल संघहरूलाई प्राथमिकतामा राखेर लगानी गर्नुपर्ने अवस्थामा राज्य रहेको बताएका छन् ।
राष्ट्रिय खेलकुद परिषद् (राखेप) ले नवनियुक्त मन्त्री श्रेष्ठको सम्मानमा बिहीबार आयोजना गरेको स्वागत र बधाई कार्यक्रममा उनले उक्त कुरा बताएका हुन् । राखेपका अध्यक्षसमेत रहेका मन्त्री श्रेष्ठले खेलको इतिहास, सफलता र उपलब्धिका आधारमा मात्र त्यस खेलप्रति लगानी गरिने प्रस्ट पारे ।
उनले वर्षौंसम्म निर्वाचन नगर्ने र ऐन नियम पालना नगर्ने राष्ट्रिय खेल संघलाई सही बाटोमा ल्याउन ऐनमा टेकेर कारबाही गर्न पछि नहट्ने बताए ।
मन्त्री श्रेष्ठले सबैसफल हुने वातावरण सिर्जना गर्न सबै क्षेत्रले एकभई प्रयास गर्नुपर्नेमा जोड दिँदै नतिजा आए मात्र राज्यले गरेको खर्चको प्रमाणीकरण हुने बताए । राखेप उपाध्यक्ष शिव कोइरालाले सबैले देखेको सपना पूरा गर्न मन्त्रालयसँगको सहकार्यमा सफल हुने धारणा राखे ।
राखेप सदस्यसचिव टंकलाल घिसिङले परिषद्को विविध पक्षबारे जानकारी गराउँदै सामूहिक प्रयासबाट कर्तव्य पूरा गर्ने प्रतिबद्धता जनाए ।
