— नेपालमा कार्यरत भारतीय नागरिकले अब मोबाइल बैंकिङ एप वा क्वीक रेन्सपोन्स (क्यूआर) कोडमार्फत भारतस्थित आफ्नो बैंक खातामा रकम जम्मा गर्न सक्ने भएका छन् । भारतमा कार्यरत नेपालीले पनि भारतीय बैंक तथा वित्तीय संस्थामा खोलेको खातामार्फत नेपाली बैंक खातामा रकम भुक्तानी गर्न सक्ने राष्ट्र बैंकले जनाएको छ ।
नेपाल राष्ट्र बैंकले शुक्रबार सार्वजनिक गरेको ‘विदेशी विनिमय कारोबार गर्न इजाजतप्राप्त निकायलाई जारी गरिएको एकीकृत परिपत्र-२०८०’ को संशोधनमा नेपालमा कार्यरत भारतीय नागरिकलाई पारिश्रमिक बापतको सटही सुविधाका लागि क्यूआर कोडमार्फत प्रतिदिन १५ हजारदेखि महिनाको १ लाख भारतीय रुपैयाँसम्म जम्मा गर्न दिइने व्यवस्था गरिएको हो ।
शुक्रबार जारी गरेको एकीकृत परिपत्र-२०८० का संशोधनसम्बन्धी व्यवस्थामा नेपाली बैंकका एप वा क्युआरमार्फत राष्ट्रिय भुक्तानी स्वीचको माध्यमबाट भारतीय बैंक तथा वित्तीय संस्थामा खोलिएको व्यक्तिगत खातामा सिमित रकम जम्मा गर्न सकिने उल्लेख छ । एकीकृत परिपत्रको दफा १७ मा उपदफा ३ थपेर राष्ट्र बैंकले यस्तो सहजता ल्याएको हो । साथै, परिपत्र २०८० को दफा १३ मा भारतबाट नेपालमा विप्रेषण भित्र्याउने प्रयोजनका लागि नेपाली नागरिकले भारतीय बैंक तथा वित्तीय संस्थामा खोलेको खातामार्फत नेपाली बैंक खातामा रकम ट्रान्सफर गर्न सक्ने भनिएको छ ।
नेपाल राष्ट्र बेंक र भारतीय रिजर्भ बैंकले व्यवस्था गरेको ‘इन्डो-नेपाल रेमिट्यान्स फसिलिटि स्किम’ अन्तर्गत यस्ता सुविधाहरू लागू गरिएका हुन् । एकीकृत परिपत्र २०८० को दफा ७ संशोधन गर्दै राष्ट्र बैंकले नेपाली व्यवसायीहरूका लागि पनि नयाँ व्यवस्था लागू गरेको छ ।
‘नेपाली व्यवसायीहरूले वस्तु तथा सेवा बिक्री गरेबापतको परिवर्त्य विदेशी मुद्रा नेपाली वाणिज्य बैंक तथा राष्ट्रिय स्तरका विकास बैंकमा खोलिएको खाता प्राप्त हुने गरी विदेशमा जारी भएको क्यूआर कोडमार्फत राष्ट्रिय भुक्तानी स्वीचको माध्यबाट स्वीकार गर्न सकिनेछ,’ संशोधित परिपत्रको दफा ७ मा भनिएको छ ।
उल्लिखित परिवर्त्य विदेशी मुद्राको सटही सुविधा नेपाली बैंकमा खोलिएको खातामा आवद्ध क्यूआर कोडमार्फत राष्ट्रिय भुक्तानी स्वीचको माध्यमबाट विदेशमा भुक्तानी हुन सक्ने गरी प्रदान गर्न सकिने पनि राष्ट्र बैंकले उल्लेख गरेको छ ।
