— राष्ट्रिय महिला क्रिकेट टिमकी प्रथम कप्तान नेरी थापाले खेल जीवनबाट संन्यास लिएकी छिन् । सोमबार फेसबुकमार्फत उनले अन्तर्राष्ट्रिय र घरेलु दुवै क्रिकेटबाट संन्यास लिएको घोषणा गरेकी हुन् । करिब १७ वर्षे क्रिकेट करियरमा नेरीले नेपाललाई महत्त्वपूर्ण उपाधिसमेत दिलाएकी थिइन् ।
नेरी पहिलो पटक सन् २००७ मा राष्ट्रिय महिला क्रिकेट टोलीको कप्तान बनेकी थिइन् । सन् २००९ मा खराब अनुशासनको कारण देखाउँदै नेरीलाई सन् २००९ मा मलेसियामा भएको एसीसी वुमेन्स ट्वान्टी-२० मा कप्तानीबाट हटाइएको थियो । त्यो प्रतियोगितामा रीतु कनौजिया कप्तान भएकी थिइन् । त्यसको २ वर्षपछि नेरीलाई पुन: कप्तान बनाइएको थियो ।
उनकै कप्तानीमा नेपालले पहिलो पटक अन्तर्राष्ट्रिय प्रतियोगिता खेलेको थियो । नेरीको कप्तानीमा नेपालले सन् २००८ र २०१० मा एसीसी यू-१९ वुमन्स च्याम्पियन्सको उपाधि जितेको थियो। पछिल्लो समय भने नेरीले एपीएफबाट घरेलु क्रिकेट खेल्दै आएकी थिइन् ।
