— आम आदमी पार्टीले अरविन्द केजरीवालले हिरासतबाटै सरकार चलाउने बताएको छ । भारतको इतिहासमा जेलबाटै सरकार चलाउने घटना पहिलो भएको पनि उसको दाबी छ ।
यसअघि गत महिना झारखण्डका मुख्यमन्त्री हेमन्त सोरेन पवर्तन निर्देशनालय (ईडी)को नियन्त्रणमा पुगेपछि मुख्यमन्त्री पदबाट राजीनामा दिएका थिए । विगतमा लालु यादव र जयललिता मुख्यमन्त्री रहँदै पक्राउ पर्दा पदबाट राजीनामा दिएका थिए । तर, केजरीवाल ईडीको हिरासतमा पुगे पनि मुख्यमन्त्री पदबाट राजीनामा भने दिएका छैनन् । आम आदमी पार्टीले मुख्यमन्त्री केजरीवालको बचाउ गर्दै उनले जेलबाटै सरकार चलाउने बताएको हो ।
भ्रष्टाचार विरोधी आन्दोलनबाट राजनीतिमा उदाएका आम आदमी पार्टीका प्रमुख दिल्लीका मुख्यमन्त्री केजरीवाल भ्रष्टाचारकै आरोपमा पक्राउ परेका हुन् । ईडीले बिहीबार राति उनलाई मुख्यमन्त्रीको सरकारी निवासबाट पक्राउ गरेको थियो । राउज एवेन्यु कोर्टले केजरीवाललाई थप ६ दिन ईडीको हिरासतमा राख्न शुक्रबार आदेश दिएको छ । ईडीले थप अनुसन्धानका लागि १० दिनको समय मागेको थियो । २०२१ मा मदिरा बिक्री वितरणको सम्बन्धमा नयाँ नीति ल्याएको र त्यस नीतिबाट दिल्ली सरकारले भ्रष्टाचार गरेको ईडीको आरोप छ । दिल्ली सरकारले मदिराको बिक्री वितरणमा खुकुलो नीति ल्याएर बिक्री वितरणको सम्पूर्ण जिम्मा निजी क्षेत्रलाई दिएको थियो । त्यसअघि मदिरा व्यापारमा सरकारको ६० र निजी क्षेत्रको ४० प्रतिशत सहभागिता रहँदै आएको थियो । नयाँ नीति ल्याएर व्यापारीहरूबाट आम आदमी पार्टीले ठूलो आर्थिक लाभ लिएको आरोप छ ।
मदिरा नीति घोटालाको आरोपमा दिल्लीका उपमुख्यमन्त्री मनीष सिसोदिया र राज्यसभा सांसद सञ्जय सिंह महिनौंदेखि ईडीको हिरासतमा छन् । मुख्यमन्त्री केजरीवाल पक्राउ घटनाप्रति विपक्षी दलहरूले तिखो प्रतिक्रिया दिएका छन् । केजरीवाल पक्राउको घटनाले सबै विपक्षी पार्टीलाई एकत्रित गरेको छ । आम आदमी पार्टीका समर्थकहरूले दिल्लीमा प्रदर्शनसमेत गरेका थिए । त्यस क्रममा आपका सयौं कार्यकर्ता र दिल्लीका दुई जना मन्त्री पक्राउ परेका छन् । विपक्षी दलका नेताहरूले निर्वाचन आयोग पुगेर चुनावको मुखमा विपक्षी पार्टीमाथि सरकारी संयन्त्रबाट भइरहेको कारबाहीलाई रोक्न भनेका छन् ।
कांग्रेस नेता राहुल गान्धीले डराएको तानाशाहले मृत लोकतन्त्र बनाउन चाहेको भनेका छन् । उनले केजरीवाल पक्राउको इन्डिया गठबन्धनले कठोर जवाफ दिने बताएका छन् । कांग्रेसले चुनावको मुखमा आफ्नो पार्टीको बैंक खाता फ्रिज गरिएको समेत बताएको छ ।
राष्ट्रिय कांग्रेसका शरद पवारले विपक्षीलाई निशाना बनाउन सरकारले केन्द्रीय एजेन्सीको दुरुपयोग गरेको आरोप लगाएका छन् । कम्युनिस्ट नेता सीताराम येचुरी, तमिलनाडुका मुख्यमन्त्री एमके स्टालिन, तृणमुल कांग्रेसका प्रमुख ममता बनर्जी, राष्ट्रिय जनता दलका नेता तेजस्वी यादव, समाजवादी पार्टीका अध्यक्ष अखिलेश यादव सहितका विपक्षी नेताहरूले केजरीवाल पक्राउ घटनाको निन्दा गरेका छन् । एकपछि अर्को विपक्षी नेताहरू सरकारी एजेन्सीको निशानामा पर्नुलाई नेताहरूले देशमा संकटकालीन स्थिति र अलोकतान्त्रिक व्यवहार भनेर टिप्पणी गरेका छन् ।
सत्तारुढ भारतीय जनता पार्टीले भने भ्रष्टचार गर्ने जो कोहीलाई सरकारी संयन्त्रले नछाड्ने बताएको छ । केन्द्रीय मन्त्री स्मृति इरानीले भ्रष्टाचार विरोधी खोल ओडेर केजरीवाल र उनको मन्त्रिमण्डलले दिल्लीका जनतालाई ठगेको आरोप लगाइन् ।
भ्रष्टचार विरोधी आन्दोलनका अभियन्ता अन्ना हजारेले मदिराको विरोधमा आफूहरूले आवाज उठाएको र आज मदिरा ल्याएकै कारण केजरीवाल पक्राउ परेकामा दुःख व्यक्त गरेका छन् । आफूले केजरीवाललाई सम्झाएको तर उनले नसुनेको हजारेले बताएका छन् ।
