— फिक्सिङको आरोप लागेका क्रिकेटर महबुब आलम र आदिल आलम अन्सारीसहित ५ क्रिकेटरले अदालतबाट सफाइ पाएका छन् । गत वर्ष काठमाडौंमा भएको नेपाल ट्वान्टी–२० लिगमा महबुब र आदिलसहितलाई केन्द्रीय अनुसन्धान ब्युरो (सीआईबी) ले विभिन्न आरोप लगाई मुद्दा दायर गरेको थियो ।
काठमाडौं जिल्ला अदालतबाट सोमबार सबैले सफाइ पाएका हुन् । जिल्ला अदालतका न्यायाधीश कमलप्रसाद पोखरेलको इजलासले स्पट फिक्सिङको आरोप लागेका पाँच क्रिकेट खेलाडीविरुद्ध सीआईबीले गरेको दाबी नपुग्ने भन्दै सफाइ दिने निर्णय गरेको हो ।
काठमाडौं जिल्ला अदालतका सूचना अधिकारी चन्द्रप्रसाद पन्थीले क्रिकेटमा स्पट फिक्सिङको आरोप लागेका पाँच जना प्रतिवादीले सफाइ पाएको जानकारी दिए । ‘पाँच जना प्रतिवादी थिए । न्यायाधीश कमलप्रसाद पोखरेलको इजलासबाट अभियोग दाबी नपुग्ने फैसला भएको छ । सबै जनाले सफाइ पाएका छन्,’ पन्थीले भने । गत वर्ष नेपाल टी–२० लिगमा स्पट फिक्सिङको आरोपमा नेपाली राष्ट्रिय टोलीका पूर्वखेलाडी महबुब आलम, आदिल अन्सारी, नितेश गुप्ता, नवीन कँडेल र रवि माझीविरुद्ध सीआईबीले मुद्दा दायर गरेको थियो । नितेश, महबुब र आदिललाई सीआईबीले पक्राउ गरेको थियो । उनीहरू अदालतबाट धरौटीमा छुटेका थिए भने नवीन र रवि फरार भएका थिए ।
नेपाली राष्ट्रिय टोलीमा रहेका आदिलले जनकपुर रोयल्सबाट खेल्नेक्रममा लिगको १२ औं खेलमा काठमाडौं नाइट्सविरुद्ध वेस्ट हाइटमा नो–बल फालेका थिए । त्यसपछि ‘फ्री हिट’ रहेको अर्को बल अफ स्टम्पभन्दा धेरै बाहिर फालेपछि उनलाई अनुसन्धानको दायरामा ल्याइएको थियो । उनले खेलको आफ्नो एकमात्र ओभरमा १५ रन दिएका थिए । उनले नेपाल टी–२० लिगको कम्तीमा दुई खेलमा सोही प्रकारले खेलेको आरोप सीआईबीको थियो ।
१७ वर्ष राष्ट्रिय टोलीबाट खेलेका महबुबले दुई नेपाली खेलाडीमाथि स्पट फिक्सिङ गर्न प्रस्ताव गरेको आरोप सीआईबीले लगाएको थियो । नेपाल टी–२० लिग सकिएको दुई सातापछि महबुबलाई विराटनगर र आदिललाई राजविराजबाट पक्राउ गरी अनुसन्धान अगाडि बढाएको थियो ।
निकै विवादस्पद नेपाल टी–२० लिगमा नवीन काठमाडौं किंग्सका मालिक थिए । नेपाल टी–२० लिगका लागि नेपाल क्रिकेट संघ (क्यान) को कमर्सियल एन्ड स्ट्रेजेटिक पार्टनर सेभेन थ्री स्पोटर््सका संस्थापक जतिन आहलुवालिया र प्रमुख कार्यकारी अधिकृत अभिषेक सकालानी क्यानलाई कुनै जानकारी नदिई प्रतियोगिताको बीचैबाट भारत फरार भएपछि विवादले उग्र रूप लिएको थियो ।
आदिलमाथि अन्तर्राष्ट्रिय क्रिकेट परिषद् (आईसीसी) ले अनुसन्धान गरिहेकाले उनले तत्कालै खेल्न पाउने सम्भावना अझै निश्चित छैन । नेपाल टी–२० लिगका दौरान फिक्सिङ प्रस्ताव आएको भनी खेलाडीहरूले उजुरी गरेपछि आईसीसी टोली काठमाडौं आएर आदिललगायतका खेलाडीको बयान लिएको थियो ।
