— नेपाली राष्ट्रिय टोलीविरुद्ध आयरल्यान्ड उल्भस (ए) ले लगातार दोस्रो खेलमा पनि खासै ठूलो चुनौती तेर्स्याउन सकेन । फलस्वरुप नेपालले दोस्रो ट्वान्टी–२० क्रिकेटमा पनि सजिलो विजय हात पार्यो । कुशल मल्ल र सोमपाल कामीले ३–३ विकेट लिएपछि नेपालले मंगलबार आयरल्यान्ड ‘ए’ लाई ७१ रनले हरायो ।
१ सय ९९ रनको लक्ष्य पाएको आयरल्यान्ड १८.३ ओभरमा १ सय २७ रनमा अलआउट भयो । यसअघि कीर्तिपुरस्थित त्रिवि क्रिकेट मैदानमा टस जितेपछि ब्याटिङमा आएको नेपालले २० ओभरमा ७ विकेट गुमाई १ सय ९८ रन बनायो ।
ओपनर आसिफ शेख ९ बल खेल्दै १ चौका र १ छक्का प्रहार गरी ११ रन बनाए । अर्का ओपनर कुशल भुर्तेलले १६ बलमा २ चौका र २ छक्कामा २५ रन बनाए । अनिल साहले ११ बलमा २ चौकासहित १२ रन बनाए ।
गुलशन झाले सर्वाधिक ४६ रन बनाए । उनले ३२ बलमा १ चौका र ४ छक्का प्रहार गरे । कुशल मल्लले ३४ रन बनाए । उनले स्पिनर गेभिन होयको बलमा लगातार तीन छक्का प्रहार गरे । कुशलले १३ बलमा १ चौका र ४ छक्का प्रहार गरेका थिए ।
कप्तान रोहित पौडेलले ३३ रन बनाए । उनले २४ बलमा ५ चौका प्रहार गरे । सन्दीप जोरा इनिङ्सको अन्तिम बलमा आउट भए । उनले १० बलमा ३ चौका र १ छक्का प्रहार गर्दै २१ रन बनाए । विवेक यादव ८ बलमा ७ रनमा अविजित रहे ।
आयरल्यान्ड ‘ए’ बाट म्याथ्यु फोस्टरले ३ र बेन ह्वाइटले २ विकेट लिए । तर, दुवै महँगा साबित भए । फोस्टरले ४ ओभरमा ४२ र ह्वाइटले ४० रन खर्चे ।
जवाफमा आयरल्यान्डले पनि उत्कृष्ट सुरुआत गरेको थियो । रोस एडाएर र स्टेफन डहनीले ४ ओभरमा ४२ रन जोड्दै आइरिस टोलीलाई उत्कृष्ट सुरुआत दिलाए । डहनीलाई सोमपालले पाॅचौं ओभरको अन्तिम बलमा आउट गरे । उनले १३ बलमा ४ चौका र १ छक्कासहित २६ रन बनाए ।
त्यसको दुई बलपछि कुशल मल्लले एडाएरलाई पनि १७ रनमा आउट गरे । उनले १७ बलमा ३ चौका प्रहार गरे । त्यसपछि आइरिस टोलीलाई अर्को बाउन्ड्री प्रहार गर्न झन्डै ८ ओभर लाग्यो । केड केर्माइकलले १८, मोर्गन टपिङले २१, कप्तान निल रकले १७ र ग्यारेथ डेलानीले १५ रन बनाए ।
नेपाल सोमबार पहिलो खेल ६ विकेटले जितेको थियो । नेपालले पहिलो खेल खेलेका दीपेन्द्रसिंह ऐरी र ललित राजवंशीलाई खेलाएन । उनीहरूको स्थानमा अनिल र विवेकलाई खेलाएको थियो । दीपेन्द्रले अविजित २० रन बनाएका थिए भने लतिलले २ विकेट लिएका थिए ।
घरेलु मैदानमा थप एक शृंखला
आयरल्यान्ड ‘ए’ सँगको खेलेपछि नेपाली राष्ट्रिय क्रिकेट टोलीको घरेलु मैदानमा अन्तर्राष्ट्रिय शृंखला सकिएको छ । नेपाली टोली बिहीबार भारतको भापीमा हुने गुजरात र बडौदाको टोलीसम्मिलित त्रिकोणात्मक शृंखला खेल्न त्यसतर्फ लाग्नेछ ।
नेपालले अर्को महिना ओमानमा एसिया कप ट्वान्टी–२० छनोट तथा जुनमा अमेरिका र वेस्ट इन्डिजमा ट्वान्टी–२० विश्वकपमा प्रतिस्पर्धा गर्दै छ । नेपाल क्रिकेट संघको वार्षिक क्यालेन्डरअनुसार यसबीचमा कुनै अन्तर्राष्ट्रिय खेल छैन । तर, प्रशिक्षक मोन्टी देसाईले यस सिजनको अन्तर्राष्ट्रिय घरेलु शृंखलामा अझै नसकिएको बताए ।
‘ट्वान्टी–२० विश्वकप खेल्न जानुअघि हामी अझै एउटा घरेलु शृंखलाको तयारी गरिरहेका छौं, यसका लागि हाम्रो प्रयास जारी छ, तर अहिले नै केही भन्न सक्ने स्थिति छैन,’ आयरल्यान्ड उल्भससँगको खेलपछि देसाईले भने, ‘यस्तो भएमा हाम्रो तयारी अझ राम्रो हुनेछ ।’ उनले कस्तो टोली नेपाल आएर खेल्न लागेको भने केही खुलाएनन् ।
एसिया कप ट्वान्टी–२० छनोट अप्रिल १२ देखि २१ मा ओमानमा हुनेछ । क्यानले मे महिनाभर विश्वकप तयारीका लागि नेपाली टोलीलाई वेस्ट इन्डिज र अमेरिका पठाउन प्रयास गरिने जनाएको थियो । जुन ४ मा नेपालले नेदरल्यान्ड्ससँग खेलेर ट्वान्टी–२० विश्वकपमा यात्रा सुरु गर्नेछ । आयरल्यान्ड ‘ए’ ले भने नेपाल ‘ए’ सँग तीन ट्वान्टी–२० र तीन ५० ओभरको खेल खेल्ने छ । पहिलो ट्वान्टी–२० बिहीबार हुनेछ ।
