अन्तरिक्षमा घुमिरहेका फोहोरका टुक्राहरु चिनियाँ स्पेस स्टेशन तियानगोङ्गमा ठोक्किएका छन् । उक्त घटनाबाट स्पेस स्टेशनमा क्षति पुगेको छ । त्यसका सोलार प्यानल क्षतिग्रस्त बनेका छन् । जसका कारण स्पेस स्टेशनमा विद्युत आपूर्तिमा अवरोध उत्पन्न भएको थियो ।
उक्त घटनापछि स्पेस स्टेशनमा रहेको चिनियाँ अन्तरिक्षयात्रीहरू बाहिर निस्किएर अन्तरिक्षमा हिडेर (स्पे वाक) गरी त्यसलाई मर्मत गरेका थिए ।
साथै चीनले अप्रिल २५ मा एकजना नयाँ अन्तरिक्षयात्रीलाई आफ्नो स्पेस स्टेशनमा पठाएको छ । उनी स्पेस स्टेशनमा जोडिएसँगै त्यहाँ रहेका पुराना अन्तरिक्षयात्री पृथ्वीमा फर्किनेछन् र स्पेश स्टेशनको थप मर्मत पनि गरिनेछ ।
पछिल्लो दुर्घटनापश्चात् अन्तरिक्ष फोहोरको सम्भावित जोखिमका विषयमा विश्वको ध्यानाकर्षण भएको छ ।
चिनियाँ मानव अन्तरिक्ष एजेन्सी (सिएमएसए) का अनुसार तियानगोङ्गको मर्मतका लागि स्टेशनमा रहेका अन्तरिक्षयात्रीहरुलाई दुईपटक स्पेस वाक गराउनु परेको थियो ।
एजेन्सीका अनुसार अन्तरिक्ष फोहोरको टुक्रा स्टेशनको बाहिरी सोलार प्यानलसँग ठोक्किएको थियो । जसका कारण केहीबेरका लागि बिजुली आपूर्तिमा समस्या उत्पन्न भएको थियो । साथै अन्तरिक्ष फोहोरसँगको टकरावका कारण तियान्हे मोड्युलमा पनि केही क्षति पुगेको थियो । त्यसका केही तारहरु काटिएका थिए ।
यो घटनासँगै चीनको स्पेस एजेन्सी अब अन्तरिक्ष फोहोरबाट स्पेस स्टेशनलाई जोगाउनका लागि नयाँ नीतिको तयारीमा लागेको छ । साथै उसले अन्तरिक्ष स्टेसनको सुरक्षाका लागि नयाँ प्राविधिक योजना पनि बनाएको छ ।
यद्यपि आफ्नो स्पेस स्टेशसँग ठोक्किएको अन्तरिक्ष फोहोर कस्तो खालको हो भन्ने बारेमा चिनियाँ स्पेस एजेन्सीले केही पनि बताएको छैन । त्यो सूक्ष्म चट्टान थियो कि कुनै स्याटेलाइटको टुक्रा भन्ने खुलेको छैन ।
वास्तवमा अन्तरिक्ष फोहोर सदैव स्पेस स्टेशनका लागि खतरा बनिरहेको छ । नर्थ अमेरिकन एरोस्पेस डिफेन्स कमान्डका अनुसार अन्तरीक्षमा ४३ हजारभन्दा धेरै फोहोरका टुक्रा रहेका छन् ।
हाल करिब ७५ सयको संख्यामा सक्रिय स्याटेलाइटहरुले पृथ्वीको परिक्रमा गरिरहेका छन् । त्यसमा सबैभन्दा धेरै स्याटेलाइट एलन मस्कको कम्पनी स्पेस एक्सका स्टारलिंक स्याटेलाइट छन् ।
सन् १९९८ मा अन्तरिक्षमा स्थापित भएपछि अहिलेसम्म अन्तरिक्ष फोहोरबाट बँच्नका लागि अन्तर्राष्ट्रिय स्पेस स्टेशनले ३० पटक आफ्नो स्थान तथा उचाइ परिवर्तन गर्नुपरेको छ ।
चीनको तियानगोङ्ग अन्तरिक्ष स्टेशनले पनि केही पटक आफ्नो स्थान परिवर्तन गरेको छ ताकि अन्तरिक्ष फोहोरसँग ठोक्किनबाट जोगियोस् ।
अन्तरिक्ष फोहोरलाई स्पेस स्टेशनमा आउनुभन्दा अगाडि नै पत्ता लगाउन सकिने प्रविधिमा चीनले अहिले काम गरिरहेको छ ताकि स्टेशनमा फोहोर ठोक्किएर कुनै क्षति नहोस् ।
