— एसियाली खेलकुद पत्रकार महासंघ (एआईपीएस एसिया) को २५ औं कंग्रेस भदौ अन्तिम साता नेपालमा हुने भएको छ । स्पेनको सान्ता सुसानामा भएको एआईपीएस एसियाको बैठकबाट नेपाल खेलकुद पत्रकार मञ्च (एनएसजेएफ) ले उक्त कंग्रेस आयोजनाको जिम्मा पाएको हो ।
बैठकमा नेपाल, मलेसिया र किर्गिस्तानले दाबी पेस गरेकामा नेपालको प्रस्ताव स्वीकृत भएको हो । नेपाल खेलकुद पत्रकार मञ्चले यसअघि सन् २०१६ मा एआईपीएस एसियाको कार्यसमिति बैठक सम्पन्न गरेको थियो ।
उक्त कंग्रेसमा ३० बढी एसियाली राष्ट्रका खेलकुद पत्रकार भेला हुनेछन् । मञ्चका अध्यक्ष दुर्गानाथ सुवेदीले मञ्चले यो ऐतिहासिक अवसर पाउनुमा मञ्चका सम्पूर्ण सदस्यको मिहिनेत र परिश्रम रहेको जनाएका छन् ।
