— रियल म्याड्रिडले वेम्बलीमा बोरुसिया डर्टमन्डले तेर्स्याएको बलियो चुनौतीलाई फाइनलमा शनिबार २–० ले निस्तेज पार्दै युरोपेली च्याम्पियन्स लिगको उपाधि जितेको छ । रियल युरोपेली च्याम्पियन भएको यो कीर्तिमानी १५औं पल्ट हो ।
प्रशिक्षकका रूपमा कार्लो एन्सेलोटीले पाँचौं पल्ट च्याम्पियन्स लिग जितेका छन् । खेलका दुवै गोल दोस्रो हाफको मध्य भागमा भएको थियो । डानी कारभाजालले ७४ औं मिनेटमा हेडबाट गोलको खाता खोले । त्यसको नौ मिनेटपछि भिनिसियस जुनियरले दोस्रो गोल थपे । डर्टमुन्डको फाइनल यात्रा धेरैका लागि अपत्यारिलो रहेको थियो । तर उसले निर्णायक भिडन्तमा रियलमाथि लगातार दबाब भने कायम राख्यो ।
युरोपेली क्लब फुटबलको सबैभन्दा ठूलो प्रतियोगितामा रियल सबैभन्दा सफल टिम रहेको छ र यो क्रमलाई उसले यसपल्ट पनि कायम राखेको छ ।
