— इंग्लिस कप्तान जस बटलरलाई लाग्छ, ट्वान्टी–२० विश्वकप क्रिकेटको उपाधि रक्षा गर्न आफ्नो टोली सक्षम छ । भलै, इंग्ल्यान्डले डिफेन्डिङ च्याम्पियनका रूपमा ५० ओभरको एकदिवसीय विश्व कपलाई जोगाउन सकेन । क्यारेबियन क्षेत्र र अमेरिकामा हुने सन् २०२४ को ट्वान्टी–२० विश्व कपमा फेरि एकपल्ट इंग्ल्यान्ड नै उपाधिका लागि बलियो दाबेदार मानिएको छ । दुई वर्षअगाडिको संस्करणमा इंग्ल्यान्डले पाकिस्तानलाई हराएर उपाधि जितेको हो ।
भारतमा सम्पन्न ५० ओभरको विश्वकपको कथा पनि यही थियो । बटलरसँगै लगभग तिनै खेलाडीले त्यो विश्व कप खेलेका थिए, तर नतिजा अत्यन्त खराब रह्यो । इंग्ल्यान्ड सुरुआतका सातमध्ये ६ खेलमा पराजित रह्यो । त्यसमध्ये पहिलो खेलमै इंग्ल्यान्ड न्युजिल्यान्डसँग ९ विकेटले पराजित भएको थियो । त्यसपछि अफगानिस्तानविरुद्धको खेल गुमाएको इंग्ल्यान्ड दक्षिण अफ्रिकाको हातबाट २ सय २९ रन अन्तरले नमिठोसँग हारेको थियो ।
ह्वाइट–बल क्रिकेटमा अहिलेको पुस्ताका सबैभन्दा राम्रा ब्याटरमध्ये एक बटलरले त्यस एकदिवसीय विश्व कपका ९ इनिङ्समा १५.३३ को औसतले १ सय ३८ रन मात्रै बनाएका थिए । त्यतिबेला नै प्रश्न उठेको थियो, के ३३ वर्षीय बटलर तीन फरक भूमिकाले गलेका त हैनन् ? ती भूमिका थिए– ब्याटर, विकेटकिपर र कप्तानको । त्यतिबेला इंग्ल्यान्डका अस्ट्रेलियाली प्रशिक्षक म्याथ्यु मोटको पनि खुबै आलोचना भएको थियो ।
मोटले जसरी पालैपालो खेलाडीलाई खेलाएका थिए, त्यसलाई कमैले मात्र रुचाए । तर भारतमा आफ्नो टिम असफल हुनुका खास कारण रहेको बटलर बताउँछन् । ‘मुख्य कुरा, हामीले भारतमा राम्रो खेल्नै सकेनौं । हामी पूरा प्रतियोगिता क्रममा द्विविधामा रह्यौं, के गर्ने र नगर्ने भनेर,’ उनी भन्छन्, ‘यो हाम्रा लागि ठूलो शिक्षा रह्यो । हामीले कहिलेकाहीं खेलाडीलाई आफूखुसी खेल्ने छुट दिन्छौं, तर यस्तो स्वतन्त्रताले सधैं ठीकसँग काम भने गर्दैन ।’
बटलरका अनुसार अहिलेको ट्वान्टी–२० विश्व कप जित्नका लागि २ सय रनभन्दा माथि बनाउनुपर्ने हुन सक्छ अथवा १ सय ४० रनको रक्षा गर्ने चुनौती पनि आउन सक्छ । ‘हामी यो विश्व कपका क्रममा इंग्ल्यान्ड उत्तिकै बलियो छ भनेर सन्देश दिन चाहन्छौं,’ बटलरले भने, ‘हामी सक्दो राम्रो खेल्न चाहन्छौं । यसपल्ट हामी आफ्नो उद्देश्यमा स्पष्ट छौं, कुनै प्रकारको द्विविधा छैन ।’ एकदिवसीय विश्व कपको तुलनामा अहिलेको प्रतियोगितामा आफ्नो टिम बलियो रहेको उनले सुनाए ।
वेस्ट इन्डिजको घरेलु क्रिकेटबाट बुझेर खेल्न सजिलो होस् भनेर इंग्ल्यान्डले टिममा वेस्ट इन्डिजका पूर्वकप्तान किइरोन पोलार्डलाई प्रशिक्षकका समूहमा समावेश गरेको छ । टिममा तीन उदीयमान खेलाडी छन् । त्यसबाट धेरै आस गर्न सकिनेछ । ती हुन्– ओपनर फिल साल्ट, माथिल्लो क्रमका ब्याटर ह्यारी ब्रुक्स र अलराउन्डर विल ज्याक्स । उनीहरू तीनै जना इंग्ल्यान्ड टिममा आफ्नो छाप छोड्न चाहन्छन् । टिममा निरन्तर सदस्य रहनका लागि पनि उनीहरूलाई त्यो जरुरी छ । तर, टिमका सबैभन्दा हेर्नलायक खेलाडी हुनेछन्, जोफ्रा आर्चर । त्यही पुरानो ५० ओभरको विश्व कपदेखि उनी कुहिनाको चोटका कारण निष्क्रियजस्तै छन् । तर यसपल्टको विश्व कपका लागि टोलीमा फर्केका छन् । उनको सबैभन्दा ठूलो विशेषता हो, उनको जन्म बार्बाडोसमा भएको हो ।
पछिल्लो १४ महिनायता पहिलो पटक इंग्ल्यान्डका लागि खेल्ने क्रममा उनले पाकिस्तानविरुद्ध २८ रनमा २ विकेट लिए र त्यसमा इंग्ल्यान्ड २८ रनले विजयी रह्यो । त्यस जितमा बटलरले ५१ बलमा ८४ रन बनाए र प्लेयर अफ द म्याच बने । उनी मान्छन्, त्यो जितमा आर्चरको प्रदर्शन उत्कृष्ट रह्यो । उनी भन्छन्, ‘इंग्ल्यान्डका लागि विकेट लिएपछि उनमा अपार खुसी देखियो । हामी सबै उनले राम्रो खेलुन् भन्ने चाहन्छौं ।’ आफ्नो जन्मभूमिमा आर्चरको प्रदर्शन कस्तो हुनेछ, त्यो हेर्नलायक रहनेछ । चारै ओभरको खेलमा बलर सीमित हुने भए तापनि आर्चरसामु आफू पूर्णतः चोटमुक्त भएको प्रमाणित गर्नुपर्नेछ ।
