— नियमित प्रतिद्वन्द्वीजस्तै बनेको नेदरल्यान्ड्सविरुद्ध खेल्दै नेपालले मंगलबार (२१ः१५ बजे) आईसीसी ट्वान्टी–२० विश्वकप क्रिकेटमा बहुप्रतीक्षित पुनरागमन गर्दै छ । दशकपछि ट्वान्टी–२० विश्वकपमा फर्किएको नेपालले डालासको ग्रान्ड प्रेरी क्रिकेट रंगशालामा हुने यहीं खेलबाट लय समात्ने आस गरिएको छ ।
समूहमा आफूभन्दा निकै बलिया टोली रहेका कारण नेपाल पहिलो खेलबाटै आफ्नो उत्कृष्ट दिने दाउमा छ । नेपालले समूह ‘डी’ मा नेदरल्यान्ड्सबाहेक श्रीलंका, दक्षिण अफ्रिका र बंगलादेशसँग खेल्नेछ । आईसीसी वरीयतामा होस् वा प्रदर्शनका हिसाबमा नेपालभन्दा सबै बलिया टोली हुन् ।
नेपालले सन् २०१४ यता पहिलो पटक ट्वान्टी–२० विश्वकप खेलिरहेको छ । यता पाँचौं पटक विश्वकप खेलिरहेको नेदरल्यान्ड्स २०२२ को पछिल्लो संस्करणमा सुपर १२ मा पुगेको थियो । नेदरल्यान्ड्सको यो नै उल्लेखनीय सफलता होइन । सन् २००९ को संस्करणमा नेदरल्यान्ड्सले इंग्ल्यान्डमाथि ४ विकेटको विजय हात पारेको थियो, त्यो पनि क्रिकेटको ‘मक्का’ मानिने लर्डसमा । सन् २०२२ मा दक्षिण अफ्रिकामाथि पनि नेदरल्यान्ड्सले ट्वान्टी–२० विश्वकपमै ३८ रनको स्मरणीय जित आत्मसात गरेको थियो ।
ठूला इभेन्टहरूमा बलिया राष्ट्रलाई ढाल्नु नै नेदरल्यान्ड्सको पहिचान हो । नोभेम्बरमा भारतमा सम्पन्न एकदिवसीय विश्वकपमा नेदरल्यान्ड्सले दक्षिण अफ्रिका र बंगलादेशलाई हराएको थियो । यसपालिको विश्वकप अभ्यास खेलमा नेदरल्यान्ड्सले श्रीलंकालाई २० रनले हराएको थियो । नेदरल्यान्ड्सले १ सय ८१ रन बनाउँदै श्रीलंकालाई १ सय ६१ रनमै अलआउट गरेको थियो । यसले डच टोलीको अलराउन्ड क्षमता प्रस्ट्याउँछ ।
नेपालसँग भने नेदरल्यान्ड्सको जितको शृंखला आलोपालो जस्तै छ । दुई टोलीबीचको पछिल्ला ५ खेलमा नेदरल्यान्ड्सले ३ र नेपालले २ खेलमा जितेको छ । नेपाललाई पराजित गर्दै मार्चमा घरेलु मैदानमा भएको नामिबियासम्मिलित त्रिकोणात्मक शृंखला नेदरल्यान्ड्सले जितेको थियो ।
‘ट्वान्टी–२० मा कुनै पनि टोलीले अर्को कुनै टोलीलाई पराजित गर्न सक्छ । नेदरल्यान्ड्सले वार्मअप खेलमा श्रीलंकालाई पराजित गरिसकेको छ, अमेरिकाले पनि ट्वान्टी–२० शृंखलामा बंगलादेशलाई दुई पटक हराइसकेको छ । त्यसैले मलाई विश्वास छ, हामीले विश्वकपमा राम्रो गर्नेछौं,’ नेपालले सुपर एटमा पुग्ने लक्ष्य बनाएको जनाउँदै कप्तान रोहित पौडेल भन्छन्, ‘नेदरल्यान्ड्ससँगको खेलप्रति नेपाली टोली केन्द्रित छ । यहींबाटै लय समात्नु जरुरी छ । खेलाडीहरू पनि आफ्नो भूमिकालाई लिएर स्पष्ट छन् ।’
तर, नेपालको प्रदर्शन राम्रो हुन सकेको छैन । क्यानडासँगको अभ्यास खेलमा नेपाल ६३ रनले पराजित भएको थियो । १ सय ८४ रनको लक्ष्य पाएको नेपाल १ सय २० रनमै अलआउट भएको थियो । यस स्थितिमा नेपालको अर्को चिन्ता ओपनिङ ब्याटिङको छ । पछिल्ला खेलहरूमा कुशल भुर्तेलको प्रदर्शन निराशाजनक छ । एसीसी प्रिमियर कपमा उनी लगातार तीन खेलमा शून्यमै आउट भए । वेस्ट इन्डिज ‘ए’ सँगको घरेलु ट्वान्टी–२० शृंखलाको चार खेलमा उनले ३२ रनमात्र बनाउन सके ।
सेन्ट भिन्सेन्ट र ह्युस्टनमा स्थानीय टोलीसँग खेलिएको अभ्यास खेलमा चल्न नसकेका भुर्तेलले क्यानडाविरुको अभ्यास खेलमा पनि १० रनमात्र बनाउन सके । उनको ओपनिङ जोडी आसिफ शेखले पनि पछिल्ला ६ खेलमा एकमात्र अर्धशतक बनाउन सकेका छन् भने ४ खेलमा दोहोरो स्कोर नै बनाउन सकेनन् । यी दुई त्यही जोडी हो, जसले २०२१ को अप्रिलमा नेदरल्यान्ड्सविरुद्ध त्रिकोणात्मक ट्वान्टी–२० शृंखलामा पहिलो विकेटमा १ सय १६ रन जोड्दै अन्तर्राष्ट्रिय क्रिकेटमा सानदार ‘डेब्यु’ गरेका थिए ।
नेपालको हालैका कमजोर नतिजाहरूलाई लिएर कप्तान रोहित समर्थकलाई चिन्ता नगर्न भन्छन् । ‘१–२ खेल तलमाथि हुन्छ, तर मलाई राम्रो खेल्नेमा आफ्नो टोलीमाथि विश्वास छ, चाहे त्यो ओपनिङ ब्याटिङमा होस् वा अन्यमा । ओपनिङ ब्याटिङले राम्रो गर्यो भने अरूलाई पनि सजिलो हुन्छ,’ रोहितले भने ।
नेपाली ब्याटिङको ठूलो आशा उनीमाथि छ । कुशल मल्ल, सन्दीप जोरा, गुलशन झाले मध्यक्रममा उनलाई साथ दिनेछन् । १० वर्षअघिको विश्वकप टोलीबाट हाल खेलिरहेका एकमात्र सदस्य सोमपाल कामीले करण केसीको साथ मध्यम गतिको बलिङ सम्हाल्ने छन् । स्पिनमा देव्रेहाते ललित राजवंशी र सागर ढकालमध्ये एकले मात्र स्थान बनाउन सक्छन् । अविनाश बोहरा क्यानडासँग राम्रो लयमा देखिएका थिए । ‘डेथ ओभर’ मा उनको बलिङ नेपाललाई निकै महत्त्वपूर्ण रहेको छ ।
नेदरल्यान्ड्सले कोलिन अकरमनको अनुपस्थितिमा माइकल लेभिटलाई टोलीमा राखेको छ । ४ महिनाअघि नेदरल्यान्ड्स टोली काठमाडौं आउँदा लेभिटले नेपालसँगको त्रिकोणात्मक ट्वान्टी–२० शृंखलाको ३ खेलमा २ मा अर्धशतक बनाएका थिए । सोही शृंखलामा नामिबियाविरुद्ध उनले ६२ बलमै १० चौका र १२ छक्का प्रहार गरी १ सय ३५ रन बनाएका थिए ।
स्कट इडवार्डसको कप्तानीमा रहेको नेदरल्यान्ड्स टोलीमा बास डे लिड, लोगान भान बिक, म्याक्स ओ डावड, सिब्रान्ड इन्गेलब्रेक्ट, विक्रम सिंह, वेस्ली बारेसी जस्ता अनुभवी खेलाडी छन् । एसोसिएट वर्ष खेलाडी अलरान्डर डे लिड टोलीका प्रमुख खेलाडी हुन् । तर २४ वर्षे उनले पछिल्लो समय राष्ट्रिय टोलीबाट कमैमात्र ट्वान्टी–२० क्रिकेट खेलेका छन् ।
सन् २०२२ को ट्वान्टी–२० विश्वकपमा १३ विकेट लिएका उनले हालै आएर आयरल्यान्ड, स्कटल्यान्डविरुद्ध ट्वान्टी–२० का साथै श्रीलंकासँगको अभ्यास खेलमा खेलेका थिए ।
नेदरल्यान्ड्सविरुद्ध दीपेन्द्रसिंह ऐरीले खेल्ने निश्चित जस्तै छ । दुई साताअघि वेस्ट इन्डिजको सेन्ट भिन्सेन्टमा एङ्कलमा चोट लागेयता उनले खेलेका छैनन् । अमेरिकाविरुद्धको अभ्यास खेलमा उनी टोलीमै थिए । तर वर्षाका कारण त्यो खेल एक बल पनि फाल्न नपाई रद्द भयो । उनी टोलीमा फर्किएपछि अनिल साहले प्लेयिङ ११ बाट स्थान गुमाउनुपर्ने वातावरण बन्न सक्छ । लयमा देखिएका अनिलले क्यानडाविरुद्धको अभ्यास खेलमा १६ बलमा २४ रन बनाएका थिए ।
टेक्सासको मौसम बदलिएको छ । पछिल्ला चार दिनमा नियमित जस्तो वर्षा भइरहेको छ । अन्यथा उच्च आर्द्रतामा खेल्न सबै टोलीलाई कठिन बन्ने गरेको छ । नेपालले डालास नजिक रहेको सहर ह्युस्टनमा एक साता अभ्यास गर्दै दुई अभ्यास खेल खेलेको थियो । त्यसपछि डालास आएर क्यानडासँग अभ्यास खेल खेलेको हो । अमेरिकासँग भने वर्षाका कारण खेल हुन सकेन । ग्रान्ड प्रेरीको विकेटमा खेलिसकेका हुनाले यो फाइदा नेपाली टोलीलाई छ ।
फ्लोरिडामा श्रीलंकासँग अभ्यास खेल खेलेको नेदरल्यान्ड्सको क्यानडासँग अभ्यास खेल वर्षाका कारण टस पनि नभई रद्द भएको थियो, जसका कारण टोलीले डालासको विकेटबारे बुझ्न पाएको छैन ।
