: दक्षिण अफ्रिकाले आइसिसी टी-२० विश्वकप २०२४ मा विजयी सुरुवात गरेको छ। नेपाल रहेको समूह डीको पहिलो खेलमा दक्षिण अफ्रिकाले श्रीलंकालाई ६ विकेटले हराउँदै विजयी सुरुआत गरेको हो।
नासौं काउन्टी इन्टरनेशल क्रिकेट स्टेडियम न्यूयोर्कमा टस जितेर पहिला ब्याटिङ रोजेको श्रीलंकाले दिएको ७८ रनको झिनो लक्ष्य दक्षिण अफ्रिकाले १६.२ ओभरमा ४ विकेट गुमाउँदै पूरा गर्यो।
दक्षिण अफ्रिकाका लागि क्विन्टन डी ककले २७ बलमा १ चौकासहित सर्वाधिक २० रन बनाए। त्यसैगरी हेनरिक क्लासेन १९ रनमा अविजित रहे। रिजा हेन्ड्रिक्स ४, एडेन माक्ररम १२, ट्रिस्टन स्टब्स १३ र डेविड मिलरले ६ रन जोडे।
श्रीलंकाका कप्तान वानिन्दु हसरंगाले २, दासुन शानका र नुवान थुसराले एक/एक विकेट लिए।
श्रीलंकाका लागि कुशल मेन्डिसले ३० बलमा १ चौकासहित सर्वाधिक १९, एन्जिलो म्याथ्युजले १६ रन र कामिन्दु मेन्डिसले ११ रन बनाए। श्रीलंकाका ८ खेलाडीले दोहोरो अंक जोड्न सकेनन्।
दक्षिण अफ्रिकाका एनरिच नोर्कियाले सर्वाधिक ४ विकेट, कागिसो रबाडा र केशव महाराजले दुई/दुई विकेट लिएका थिए।
समूह डी को दोस्रो खेलमा आज ग्राण्ड प्रेरी रंगशाला डालसमा नेपाल र नेदरल्यान्ड्सबीच राति ९:३० मा सुरु हुनेछ। समूह डीमा बंगलादेश पनि छ।
