— नेपाल र नेदरल्यान्ड्सले ट्वान्टी-२० विश्वकपमा मंगलबार आफ्नो पहिलो खेल खेल्दै छन् । कठिन मानिएको समूह ‘डी’ मा नेपाल र नेदरल्यान्ड्स बाहेक, श्रीलंका, दक्षिण अफ्रिका र बंगलादेश रहेका छन् ।
नेपाल १० वर्षयता पहिलो पटक ट्वान्टी-२० विश्वकपमा खेलिरहेको छ । नेपालले सन् २०१४ मा बंगलादेशमा पहिलो पटक ट्वान्टी-२० विश्वकप खेलेको थियो र सोक्रममा हङकङ र अफगानिस्तानलाई पराजित गरेको थियो । आयोजक बंगलादेशसँग पराजित भएर नेपाल थोरै रन अन्तरले दोस्रो चरणमा पुग्नबाट रोकिएको थियो ।
पाँचौं पटक ट्वान्टी-२० विश्वकप खेलिरहेको नेदरल्यान्ड्स २०२२ को पछिल्लो संस्करणमा सुपर १२ मा पुगेको थियो । नेदरल्यान्ड्सले विश्वकपको २२ खेलमा ९ मा विजय हात पारेको छ भने १३ मा पराजय भोगेको छ । पछिल्लो दुई खेल जितेको नेदरल्यान्ड्स मंगलबार नेपाललाई पराजित गरी हृयाट्रिक जित निकाल्ने दाउमा छ ।
हेड टु हेड
नेपाल र नेदरल्यान्ड्स नियमित प्रतिद्वन्द्वी जस्तै हुन् । २०१५ को जुन ३० मा एमस्ट्राडाममा पहिलोपटक आमने सामने भएयता यी दुई बीचको यो १२ औं खेल हो । नेदरल्यान्ड्सले ६ र नेपालले ५ खेल जितेका छन् । मार्चमा काठमाडौंमा भएको त्रिकोणात्मक ट्वान्टी-२० शृंखलामा नेदरल्यान्ड्सले नेपालविरुद्धको ३ मध्येको दुई खेल जितेको थियो, जसमा फाइनलमा नेदरल्यान्ड्सले ६ विकेटको विजय हात पारेको थियो ।
ट्वान्टी -२० अन्तर्राष्ट्रिय
नेदरल्यान्ड्ससँगको खेल नेपालको ट्वान्टी-२० अन्तर्राष्ट्रियमा ८४ औं खेल हुनेछ । नेपालले त्यसमा ४९ खेल जितेको छ भने ३३ मा पराजय भोगेको छ । एक खेल ‘टाई’ भएको थियो, जुन खेल नेपाल र ओमान बीच नोभेम्बरमा कीर्तिपुरमा भएको विश्वकप एसिया छनोटको फाइनल थियो । नेदरल्यान्ड्सले ट्वान्टी-२० अन्तर्राष्ट्रियमा १ सय ३ खेलिसकेको छ । त्यसमा ५३ खेल जितेको छ भने ४८ खेलमा पराजय भोगेको छ । दुई खेल ‘टाई’ मा टुंगिएका छन् ।
भुर्तेल सामु अवसर
कुशल भुर्तेलले ट्वान्टी-२० अन्तर्राष्ट्रियमा ९ अर्धशतक प्रहार गरिसकेका छन् । नेपालबाट उनीभन्दा बढी अर्धशतक दीपेन्द्रसिंह ऐरी (१०) ले मात्र बनाएका छन् । तर भुर्तेल पछिल्लो समय राम्रो लयमा देखिएका छैनन् । उनी अप्रिलमा ओमानमा भएका एसीसी प्रिमियर कप ट्वान्टी २० मा लगातार तीन खेलमा ‘डक आउट’ भएका थिए । वेस्ट इन्डिज ‘ए’ सँगको घरेलु ट्वान्टी २० शृङ्खलाको चार खेलमा उनले ३२ रनमात्र बनाउन सकेका थिए ।
कुशल मल्लको ब्याटिङ स्ट्राइक रेट १६७.२ को छ, जुन नेपाली खेलाडीमा सबैभन्दा उच्च हो । त्यस्तै दीपेन्द्रसिंह ऐरीले ३८.७ को औसतमा रन बनाएका छन् भने उनलाई पछ्याउदै मल्लले २९.७ को औसतमा रन बनाएका छन् ।
नेदरल्यान्ड्सका तीब्र बलर पाउल भान मिकेरेनले ट्वान्टी २० विश्वकपमा १८ विकेट लिइसकेका छन् । उनले खेलेको ट्वान्टी २० विश्वकपको ११ खेलमा एक खेलमा मात्र विकेट लिन सकेका छैनन् ।
खेल अघि कसले के भने
रोहित पौडेल, कप्तान, नेपाल
क्यानडा र अमेरिकाको खेलपछि ‘नाइस नर्भसनेस’ आइरहेको छ । हामी सबै उत्साहित छौं र नेदरल्यान्ड्सको खेललाई लिएर प्रतिक्षामा छौं । नेपालका लागि यो इभेन्ट निकै महत्त्वपूर्ण छ । पछिल्ला दश वर्षदेखि हामी विश्वकपमा खेल्न सकिरहेका थिएनौं । त्यसैले हामी सबै र नेपाल क्रिकेटका लागि यो विश्वकप निकै महत्त्वपूर्ण छ । बच्चा हुँदादेखि नै विश्वकप खेल्ने सपना थियो । अब त्यो सपना पुरा गर्ने अवसर पाइरहेका छौं । साथै जिम्मेवारी पनि आएको छ, त्यो हामी पुरा गर्नेछौं ।
नेदरल्यान्ड्ससहित सहभागी सबै टोली उत्तिकै राम्रा छन् । नेदरल्यान्ड्सविरुद्ध पछिल्लो समय हामी खेल्दै पनि आएका छौं । जसले दबाबलाई झेल्न सक्छ, त्यही टोलीले जित्न सक्छ जस्तो लाग्छ । क्यानडासँग ग्रान्ड प्रेरी क्रिकेट रंगशालामा खेलेको आधारमा भन्नुपर्दा यो विकेटमा अलिकति बाउन्स छ । यो बुझेर हामीले खेल्नुपर्छ । दिउँसो खेलिरहेकाले घाम, उच्च आद्रताहरु पनि हेरेर खेल्नुपर्ने हुन्छ ।
नेदरल्यान्ड्स टिम पनि धेरै राम्रो छ । हाम्रो समूहमा रहेका श्रीलंका, दक्षिण अफ्रिका, बंगलादेश हामी भन्दा राम्रो टोली हुन् । तर दुवै टोलीले एउटै सिमाबाट खेल सुरु गर्ने हो, त्यसैले हामी आफ्नो खेलमा विश्वास गर्छौं ।
रायन कुक, प्रशिक्षक, नेदरल्यान्ड्स
नेपाल राम्रै टोली हो भन्ने हामीलाई थाहा छ, किन भने हामीले उनीहरुसँग हालैका दिनमा खेलेका थियौं । तर हामीले दक्षिण अफ्रिका, बंगलादेश र श्रीलंकासँग पनि हालैका दिनहरुमा खेलेका थियौं ।
त्यो ५० ओभरको विश्वकप र छनोटचरणहरुमा थियो । त्यसैले हामी यो समूहका खेलहरुको प्रतिक्षामा छौं । मलाई विश्वास छ, यो समूहमा ठूलो उथुलपुथल हुनेछ ।
