। नेपालमा आयोजना हुने साफ यू २० च्याम्पियनसिपमा नेपाल कठिन समूहमा परेको छ ।
दक्षिण एसियाली फुटबल महासंघ (साफ) ले शनिबार सार्वजनिक गरेको ‘ड्र’अनुसार आयोजक नेपाल समूह ए मा छ । यस समूहमा नेपालसहित चार टोली छन् भने समूह बी मा तीन टोली छन् ।
समूह ए मा नेपाल, पाकिस्तान, बंगलादेश र श्रीलंका छन् भने साविक विजेता भारतसहित माल्दिभ्स र भुटान समूह बी मा छन् । साफ यू २० च्याम्पियनसिप आगामी अगष्ट १६ देखि २८ सम्म नेपालमा आयोजना हुँदैछ ।
यसअघि २०२३ मा नेपालमै भएको साफ यू १९ च्याम्पियनसिपमा नेपाल सेमिफाइनलमा भारतसँग पराजित भएको थियो ।
अहिलेसम्म भएको पाँच संस्करणमध्ये भारतले ३ पटक र नेपालले २ पटक उपाधि जितेको छ ।
सन् २०१५ र २०१७ मा नेपालले सुरुवाती दुई संस्करणको उपाधि जितेको थियो । त्यसपछि भारतले लगातार तीन संस्करण जित्दै उपाधिमा ह्याट्रिक गरेको थियो ।
