। नेपाली राष्ट्रिय फुटबल टिमका मुख्य प्रशिक्षक भिन्सेन्जो अल्बर्टो एनेसको कार्यकाल जेठ अन्तिमसम्म मात्रै छ । एनेस २०७९ साल फागुन १७ गते नेपालको मुख्य प्रशिक्षक नियुक्त भएका थिए । उनलाई अखिल नेपाल फुटबल संघ (एन्फा)ले सुरुमा एक वर्षका लागि नियुक्त गरेको थियो ।
पछि नेपालले फिफा विश्वकप र एसियन कपको छनोटको दोस्रो चरण खेलिरहेकोले एन्फाले एनेसको कार्यकाल साढे ३ महिना थप्ने निर्णय गर्यो । एन्फाले छनोटको दोस्रो चरण सम्मका लागि पनि उनीसँगै सम्झौता थप्यो ।
गत पुसमा बसेको एन्फा कार्यसमिति बैठकले छनोटमा ४ खेल बाँकी रहेकोले उनको सम्झौता छोटो अवधिका लागि थप गर्ने निर्णय गरेको थियो । उक्त सम्झौता अनुसार अब उनको प्रशिक्षणमा अन्तिम खेल खेल्न बाँकी छ ।
अब नेपालले दोस्रो चरणमा समूह एचको अन्तिम खेल खेल्न बाँकी छ । यमनविरुद्धको उक्त खेल नेपालले जुन ११ अर्थात २९ जेठमा साउदी अरेबियाको दम्मानमै खेल्नेछ । उक्त खेल नै एनेसको वर्तमान कार्यकालको अन्तिम खेल हुनेछ । त्यसपछि उनी फेरि दोहोरिन्छन् या दोहोरिँदैनन् हेर्न बाँकी छ र नेपाली फुटबल प्रेमीको चासो पनि यसैमा छ ।
के छ एनेसको चाहना ?
उमेरले चार दशकमात्र भएका इटालियन नागरिक अल्बर्टो एनेसले भने आफू नेपालमै काम गर्न इच्छुक रहेको र नेपालमै बस्न मन भएको बताउँदै आएका छन् ।
विश्वकप छनोट अन्तर्गत नेपालले दोस्रो चरणमा ५ खेल खेलिसक्दा एक खेल पनि जित्न सकेको छैन । अझै ती सबै खेलमा एक गोल पनि गर्न सकेको छैन ।
यस्तोमा नेपाली टिम खेलाडी र प्रशिक्षक सबै गोल गर्नुपर्ने र अंक जोड्नुपर्ने स्वभाविक दबाबमा छन् । खेलाडीहरु विदेश पलायन हुने क्रम जारी रहँदा अहिले बलियो राष्ट्रिय टिम बनाउनु ठूलो चुनौती छ ।
यसअघि नेपालले बहराइनविरुद्ध गत चैतमा भएको विश्वकप छनोटका खेलको बेला एनेसले आफू नेपालमै बस्ने चाहना भएको सुनाएका थिए । अब यमनविरुद्धको खेलपछि उनको भविष्यबारे निर्णय हुनेछ ।
युएई र यमनविरुद्ध साउदी अरेबियामा खेल्न जानुअघि सम्झौताबारे सोध्दा प्रशिक्षक एनेसले आफू नेपालको टचलाइनमा अझै देखिने बताएका थिए । ‘छनोटको खेलपछि पनि तपाईंले मलाई नेपालको टचलाइनमा देख्नुहुनेछ’, उनले भनेका थिए ।
एन्फाले भने प्रशिक्षकको सम्झौताबारे अहिलेसम्म कुनै निर्णय गरेको छैन । एनेसलाई नै निरन्तरता दिने वा नयाँ प्रशिक्षक नियुक्त गर्ने भन्ने एन्फाबाट आधिकारिक रुपमा कुनै धारणा पनि राखेको छैन ।
तर एन्फाकै स्रोतका अनुसार एन्फा अर्को प्रशिक्षकको खोजीमा छ । एनेसको नेपाल बस्ने सम्भावना ५०-५० जस्तै छ । एन्फाले अहिलेसम्म नयाँ प्रशिक्षक नियुक्तिका लागि कुनै आवेदन खुलाएको छैन । यस्तै एनेसलाई निरन्तरता दिने जानकारी पनि गराएको छैन ।
यही प्रशिक्षकलाई निरन्तरता दिने वा नयाँ प्रशिक्षक खोज्ने भन्ने विषयमा अहिले एन्फा आन्तरिक छलफलमा छ र यसबारे छिटै यसबारे निर्णय गर्ने तयारीमा छ ।
अहिलेसम्मको बुझाइअनुसार एन्फाले नेपाली फुटबललाई लागि योग्य नयाँ प्रशिक्षक भेटेमा उसैलाई नियुक्त गर्ने तयारी गरिरहेको छ । यदि त्यस्तो नभएमा भने एनेसले नै निरन्तरता पाउने सम्भावना पनि छ ।
यमनसँगको खेलपछि सम्भवत: यसबारे निर्णय आउन सक्छ ।
एनेसको प्रशिक्षणमा नेपालको प्रदर्शन
अल्बर्टो एनेस प्रशिक्षक भएर आएपछि नेपालले थ्री नेसन्स कप फुटबल, साफ च्याम्पियनसिप, विश्वकप छनोट र केही मैत्रीपूर्ण खेलहरु खेलेको छ । उनको प्रशिक्षणमा नेपालले पहिलो प्रतियोगिता प्रधानमन्त्री कप थ्री नेसन्स कप उपाधि जितेको छ ।
उक्त प्रतियोगितामा नेपालसहित लाओस र भुटान सहभागी थिए जहाँ नेपालले फाइनलमा लाओसलाई हराएर उपाधि जितेको थियो ।
त्यसपछि बेंगलुरुमा गत जुनमा भएको साप च्याम्पियनसिपमा साविक उपविजेताको रुपमा सहभागी नेपाल समूह चरणबाटै बाहिरिएको थियो ।
कुवेत र भारतसँग पराजित भएको नेपालले पाकिस्तानलाई मात्र पराजित गरेको थियो । त्यतिबेलै प्रशिक्षक एनेसले नेपाली टिम छाड्ने हल्ला चलेको थियो तर उनले बेंगलुरुमै नेपाली पत्रकारहरुसँग कुरा गर्दै आफूले नेपाली टिमसँगै हुने बताएका थिए ।
यस्तै फिफा विश्वकप २०२६ र एसियन कप २०२७ को संयुक्त छनोटअन्तर्गत नेपालले अहिलेसम्म ७ खेल खेल्यो । जसमा नेपालले लाओसविरुद्ध प्रारम्भिक चरणमा एक खेल जितेको थियो भने एक खेल बराबरी खेलेको थियो । त्यसयता विश्वकप छनोटको दोस्रो चरणमा नेपालले खेलेको सबै ५ खेलमा पराजित भएको छ ।
प्रारम्भिक चरणमा नेपालले लाओसलाई दुई लेगको खेलमा २-१ ले पराजित गरेको थियो । घरेलु मैदान १-१ को बराबरी खेलेको नेपालले अवे मैदानमा लाओसलाई १-० ले पराजित गरेको थियो ।
यस्तै विश्वकप छनोटको दोस्रो चरणमा भने नेपाल जितविहीन छ । युएईसँग दुवै खेलमा समान ४-० ले पराजित भएको नेपाल बहराइनसँग ५-० र ३-० ले पराजित भएको थियो । यस्तै घरेलु मैदानमा भएको यमन विरुद्धको खेलमा पनि नेपाल २-० ले पराजित भएको थियो ।
यस बाहेक एनेसको प्रशिक्षणमा नेपालले केही मैत्रीपूर्ण खेल पनि खेलेको थियो । जसमा साफ च्याम्पियनसिप अघि खेलिएको फिलिपिन्ससँग मैत्रीपूर्ण खेलमा नेपाल १-० ले पराजित भएको थियो ।
साफ च्याम्पियनसिपपछि नेपालले सिधै सेप्टेम्बरमा म्यानमारसँग दुई मैत्रीपूर्ण खेल खेलेको थियो । जसमा पहिलो खेल बराबरी खेलेको नेपाल दोस्रो खेलमा पराजित भयो ।
यस्तै नेपालले मलेसिया र इंग्ल्याण्ड सी सँग अनअफिसियल खेल खेलेको थियो । तर दुवैमा नेपाल पराजित भएको थियो ।
एनेसको प्रशिक्षणमा नेपालले थ्री नेशन्स कपमा ३ खेल, साफ च्याम्पियनसिपमा ३ खेल, विश्वकप छनोटमा ७ खेल तथा ३ मैत्रीपूर्ण गरी कूल १६ खेल खेलेको छ । जसमा नेपालले जम्मा ४ खेल मात्र जितेको छ । यस्तै ३ खेल बराबरी खेल्दा १० खेलमा पराजित भएको छ ।
