। आईसीसी टी–२० विश्वकप २०२४ मा घरेलु टोली अमेरिकाले सुरुवाती दुई खेलमा सानदार प्रदर्शन गरेको छ । पहिलो खेलमा क्यानडाले दिएको १९५ रनको लक्ष्य अमेरिकाले १७.४ ओभरमा मात्रै ३ विकेटको क्षतिमा पूरा गरेको थियो ।
उक्त खेलमा आरोन जोन्सले ४० बलमा ४ चौका र १० छक्कासहित ९४ रनको विष्फोटक इनिङ खेलेका थिए । उक्त इनिङबाट जोन्सले विश्वको ध्यान आफूतिर ताने ।
बिहीबार अमेरिकाले टी–२० विश्वकप इतिहासकै एक ठूलो उथलपुथल गर्न सफल भयो । त्यो थियो टी–२० विश्वकप विजेता पाकिस्तानलाई सुपर ओभरमा स्तब्ध पार्नु । गत संस्करण २०२२ को फाइनलमा पुगेको तथा २००९ को च्याम्पियन पाकिस्तानलाई अमेरिकाले हराइदियो ।
वर्तमान समयका उत्कृष्ट ब्याटर बाबर आजम, मोहम्मद रिजवान र फखार जमान जस्ता ब्याटर भएको पाकिस्तानलाई अमेरिकाले १५९ रनमै रोकेको थियो । वर्तमान विश्व क्रिकेटको उत्कृष्ट र तीव्र गतिको बलिङ आक्रमण भएको पाकिस्तानविरुद्ध अमेरिकाले २० ओभरमा ३ विकेट गुमाउँदै १५९ रन बनाएको थियो ।
अमेरिकालाई अन्तिम ओभरमा जित्नलाई १५ रन चाहिएको थियो । वर्तमान विश्व क्रिकेटमा सर्वाधिक गतीमा बलिङ गर्ने हरिस रौफविरुद्ध आरोन जोन्स र नितेश कुमारले १४ रन जोड्दै सुपर ओभरमा खेल पुर्याएका थिए । सुपर ओभरमा अमेरिकासँग पाकिस्तान स्तब्ध भयो ।
भारतसँग पनि पराजित पाकिस्तान समूह चरणबाटै बाहिरिने संघारमा छ भने अमेरिका सुपर–८ खेल्ने बलियो सम्भावना छ ।
अमेरिकाले विश्वकप अघि ह्युस्टनमा अर्को टेस्ट टोली बंगलादेशविरुद्ध टी–२० आई सिरिज २–१ ले जितेको थियो । उक्त सिरिजबाट मोमेन्ट्स कायम गर्न सफल भयो । पहिलो पटक टी–२० विश्वकप खेलेको अमेरिकाले सानदार प्रदर्शन गर्न सफल भएको थियो । सह–आयोजक हुँदा अमेरिका पहिलो पटक सोझै विश्वकप खेल्न पाएको थियो ।
अमेरिकाले सानदार प्रदर्शन गर्नुमा घरेलु मैदान, कन्डिसन, मेजर लिग र टेस्ट टोलीका खेलाडी समेट्नु हो । त्यसमा पनि टेस्ट टोलीका खेलाडी हुनु प्रमुख आधार हो । टेस्ट टोलीबाट घरेलु, उमेर र सिनियरबाट खेलको अनुभव छ । विश्वस्तरीय खेलाडीसँग खेलेको अनुभव हुँदा विश्वकपमा ठूला टोलीविरुद्ध प्रदर्शन गर्न सहज भएको छ ।
अमेरिकाको १५ सदस्य टोलीमा अहिले १२ खेलाडी अन्य देशबाट आएर खेलेका छन् । क्यानडाविरुद्ध ९४ रन बनाउने आरोन जोन्स, ओपनर स्टिभ टेलर, जसदीप सिंह र नोष्थुश केन्जिगे अमेरिकामा जन्मिएका खेलाडी हुन् । उनीहरुका बुबा–आमा अमेरिका बसाइँ सरेर गएका थिए । टेलर जमैका, जोन्स बार्बाडोस, जसदीप र केन्जिगेका बुबा–आमा भारतीय मूलका थिए । जन्म अमेरिकामा भए पनि सिकाइ वेष्टइण्डिज र भारतमा गएर गर्न पाए ।
अन्य कुन खेलाडी कुन देशका ?
पाकिस्तानलाई सुपर ओभरमा हराउन मात्रै १३ रन खर्चेका सौरभ नेत्रवालकर भारतबाट सन् २०१० मा यू–१९ विश्वकप खेलेका खेलाडी हुन् । उनले मुम्बईबाट सन् २०१३ मा रणजी ट्रफी खेलेका थिए । पाकिस्तानलाई हराउन ५० रन बनाउँदै प्लेयर अफ द म्याच चुनिएका मोनांक पटेलले गुजरातबाट यू–१८ सम्मको घरेलु क्रिकेट खेलेका थिए ।
स्पिन अलराउण्डर हरमित सिंहले सन् २०१० र २०१२ मा भारतबाट यू–१९ विश्वकप खेलेका थिए । सन् २०१३ को आईपीएल स्पट फिक्सिङमा पनि उनको नाम मुछिएको थियो । त्यस्तै निसर्ग पटेलको जन्म गुजरातमा भएको थियो ।
सुपर ओभरमा इफ्तिखर अहमदको उत्कृष्ट क्याच लिएका मिलिन्ड कुमार एक समय भारतीय क्रिकेटका चर्चित खेलाडी थिए । ३३ वर्षीय कुमारले दिल्ली र सिक्किमबाट ४६ रणजी ट्रफी खेल्दै ९ शतक हानेका छन् । आईपीएलमा उनी दिल्ली क्यापिटल्स र रोयल च्यालेन्जर्स बेंगलोरमा पनि आबद्ध भएका थिए ।
क्यानडाविरुद्ध ६५ तथा पाकिस्तानविरुद्ध ३५ रन बनाएका एन्ड्रिस गौस दक्षिण अफ्रिकी खेलाडी हुन् । उनले दक्षिण अफ्रिकाबाट यू–१९ र घरेलुमा ६५ प्रथम श्रेणी खेल खेलीसकेका छन् ।
अमेरिकाको टोलीमा पाकिस्तानमा जन्मिएका दुई खेलाडी छन् । तीव्र गतिका बलर अली खान र ब्याटर शयान जहानजिर पाकिस्तानमा जन्मिएका खेलाडी हुन् । अलीखान १८ वर्षको उमेरमा पाकिस्तान छाडेका थिए । शयानले पाकिस्तानबाट यू–१९ क्रिकेट र घरेलु क्रिकेट दुबै खेलेका छन् ।
न्युजिल्यान्डका पूर्वसुपरस्टार ब्याटर कोरी एन्डरसन अमेरिका टोलीमा आएपछि माहोल झनै उत्कृष्ट बनेको छ । ३३ वर्षीय कोरीले १३ टेस्ट र ४९ ओडीआई न्युजिल्यान्डबाट खेलेका थिए । सन् २०१४ मा उनले वेष्टइण्डिजबाट ४७ बलमा ६ चौका र १४ छक्कासहित १३१ रन बनाएका थिए । कोरी मध्यक्रममा विष्फोटक ब्याटिङसँगै तीव्र गतिमा बलिङ पनि गर्दछन् ।
क्यानडामा जन्मिएर नितेश कुमारले त्यहीँबाट क्रिकेट खेलेका थिए । उनले सन् २०१० मा क्यानडाबाट डेब्यू गरेका थिए । तर यस पटकदेखि उनी अमेरिकाको टोलीमा छन् ।
समग्रमा भन्नुपर्दा अमेरिकी विश्वकप क्रिकेट टोलीका सदस्यहरु अमेरिकामै जन्मिएका तथा भारत, दक्षिण अफ्रिका, क्यानडा, पाकिस्तान र न्युजील्याण्डमा जन्मिएकाहरु छन् ।
अमेरिकामै जन्मिएका : स्टिभ टेलर, आरोन जोन्स, जसदीप सिंह र नोेष्शुष केन्जिगे ।
भारत : मोनांक पटेल, हरम्रित सिंह, सौरभ नेत्रवालकर, निसर्ग पटेल र मिलिन्दकुमार ।
दक्षिण अफ्रिका : एन्ड्रिस गौस र शाड्लीभान शाक्ली ।
क्यानडा : नितेश कुमार
पाकिस्तान : अली खान र शयान जहानजिर ।
न्युजिल्यान्ड : कोरी एन्डरसन ।
