। अखिल नेपाल कबड्डी संघको आयोजनामा सीता दाहाल महिला अन्तर्राष्ट्रिय कबड्डी च्याम्पियनसिप नेपालमा हुने भएको छ । पाँच राष्ट्र सहभागी हुने उक्त च्याम्पियनसिप असार ४ देखि ८ गतेसम्म काठमाडौंमा आयोजना हुने संघका महासचिव अरविन्द झाले जानकारी दिए ।
च्याम्पियनसिपमा नेपालसहित इरान बंगालदेश श्रीलंका र इन्डोनेसियाको सहभागिता हुनेछ । नेपालको महिला टोलीले गत असोजमा चीनको हान्झाउमा भएको १९औं एसियाडमा ऐतिहासिक कांस्य जितेको थियो ।
पहिलो पटक एसियाडमा सहभागी भएको नेपाली महिला टिमले समूह चरणमा बंगलादेशलाई हराएको थियो भने इरानसँग पराजित भएको थियो । सेमिफाइनलमा भने नेपाल भारतसँग पराजित भएको थियो । नेपाल र इरानले सेमिफाइनल पुग्दै कांस्य पदक जितेका थिए ।
यस्तै नेपालको महिला टिमले सन् २०१९ मा काठमाडौंमै भएको १३औं दक्षिण एसियाली खेलकुद (साग) मा ऐतिहासिक रजत पदक जितेको थियो ।
केही समयअघि नेपालको पुरुष टोली बंगलादेशमा भएको बंगबन्धु कप अन्तर्राष्ट्रिय कबड्डी प्रतियोगितामा उपविजेता बनेको थियो । पहिलो पटक फाइनल पुगेको नेपाल घरेलु टोली बंगलादेशसँग पराजित हुँदै उपविजेता बनेको थियो ।
