: नेपाल क्रिकेट संघ (क्यान)का अध्यक्ष चतुरबहादुर चन्दले झुटो विषयमा उठाएर सांसद भीम आचार्यले संसदलाई गुमराहमा राखेको बताएका छन्। एमाले सांसद आचार्यले गत बुधबारको प्रतिनिधिसभा बैठकमा क्यान पदाधिकारीहरूले आर्थिक अपचलन गरेको आरोप लगाएका थिए।
सांसद आचार्यले अवैधरूपमा जर्सी विक्री गरेको, खेलाडीलाई होटलमा उभ्याएर चन्दा उठाएको र आईसीसीबाट आएको टिकट महँगो मूल्यमा विक्री गरेर क्यान पदाधिकारीहरूले निजी खातामा जम्मा गरेको आरोप लगाएका थिए।
क्यान अध्यक्ष चन्दले सांसद आचार्यको अभिव्यक्तिमा आंशिक सत्यतासमेत नरहेको बताएका छन्। शुक्रबार विज्ञप्ति जारी गरेर क्यान अध्यक्ष चन्दले भनेका छन्, 'आंशिकसमेत सत्यता नभएको झुठो र कपोलकल्पित बुँदाहरू नेपालको गरिमामय सदनमा उठान गरेर एक जना माननीय सांसदज्यूले सम्मानित सदनलाई गुमराहमा राख्नुका साथै आफूले प्रतिनिधित्व गर्ने राजनीतिक दललाई समेत विवादमा ल्याउन खोजेको देखिन्छ।'
उनले क्रिकेट खेलको नाममा राजनीति गर्नेहरूले आफ्नो देशले विश्वकप खेलिरहेको यस महत्वपूर्ण समयमा क्रिकेट तथा संघको विरूद्धमा अनर्गल प्रचार गर्दा विश्वकपमा सहभागिता जनाइरहेका खेलाडीको मनोबल नगिराउन आग्रह गरेका छन्। विचार नगरी क्रिकेटको नाममा राजनीति गर्न खोज्नेहरूले नेपाली क्रिकेट विवादित र विभाजन गर्न खोजेको उनको भनाइ छ।
'नेपाल क्रिकेट संघको नाममा कोही कसैले क्रिकेटको हकहितविरुद्ध कुनै गैरकानुनी काम कारबाही गरेमा कानुन बमोजिम सजाय हुनुपर्छ भन्ने कुरामा नेपाल क्रिकेट संघ स्पष्ट छ। हुँदै नभएको झुटा तथा कपोलकल्पि कुरा गरिमामय सदनमा सांसदज्यूले उठाउनाले सम्मानित सदन, सांसदज्यू तथा नेपाली क्रिकेटको गरिमा घटाएको छ,' विज्ञप्तिमा भनिएको छ।