— बेल्जियम अहिले फेरि पुरानो आत्मविश्वासले खेल्ने मनसायमा छ । चाहन्छ सन् २०२२ को विश्वकपको नमीठो अनुभव मेट्न सकोस् । युरो २०२४ मा सोमबार स्लोभाकियाको सामना गर्दा बेल्जियम आफैं लयमा छ लगातार १५ खेलको अपराजित यात्रासँगै ।
बेल्जियमको तथाकथित ‘गोल्डेन जेनेरेसन’ कतारमा पहिलो चरणबाटै बाहिरिएको थियो । तर, त्यसयता टिममा केही नयाँ अनुहारले प्रवेश पाएका छन् ।
सन् २०२३ को फेब्रुअरीमा डोमिनिको टेडेस्कोले प्रशिक्षणको जिम्मेवारी सम्हालेका थिए । त्यसयता टिम अपराजित नै छ । यसपल्ट जर्मनीमा चलिरहेको प्रतियोगितामा बेल्जियम उपाधिको दाबेदार पनि मानिएको छैन । यसले सम्भवतः केही राहत दिएको हुनुपर्छ, टिमलाई । अधिकांश फुटबल पण्डित के कुरामा सहमत छन् भने ड्रेसिङ रूमका वातावरण शान्त रहने हो र प्रमुख खेलाडी चोटबाट टाढा रहने हो भने सबै खाले सम्भावना खुला छ ।
जर्मन–इटालियन प्रशिक्षक टेडेस्को आएयता टिमले १५ खेलमध्ये १० मा क्लिन सिटमात्र राखेको छैन, उल्टै प्रतिद्वन्द्वीमाथि ३३ गोल गरेको छ । रोमेलु लुकाकु, केभिन डी ब्रुएना र जान भेर्टागन जस्ता अनुभवी खेलाडीलाई युवा जेरेमी डोकु, योहान बाकायोका र एमान्डु ओनानाले बलियो साथ दिइरहेका छन् । सम्भवतः स्लोभाकिया आफै पनि लयमा छ । टोलीले सान मारिनो र वेल्सविरुद्ध खेलेका पछिल्ला दुई मैत्रीपूर्ण खेलमा समान ४–० को प्रभावशाली जित निकालेको छ ।
स्लोभाकियाका प्रशिक्षक हुन्, इटाली फ्रान्सिस्को कालजोना । उनी भन्छन्, ‘हाम्रो समूहमा विना कुनै विवाद बेल्जियम नै सबैभन्दा बलियो टिम हो । बेल्जियम टिम आफैं अहिले परिवर्तनबाट गुज्रिइरहेको छ । पुराना खेलाडी बाहिर जाँदै छन् भने नयाँ भित्रिदै छन् । हामी प्रतिद्वन्द्वीका रूपमा बेल्जियमलाई बलियो नै मान्छौं । बेल्जियम र स्लोभाकियाबीच ३ खेल भएको छ । बेल्जियम एक विजयी छ भने दुई बराबरीमा टुंगिएको छ ।
