विकिलिक्सका संस्थापक जुलियन असान्ज वर्षौं लामो कानुनी लडाइपछि बेलायती जेलबाट रिहा भएका छन् । अमेरिकी प्रशासनसँग सम्झौता भएपछि जुलियन असान्जलाई रिहा गरिएको समाचारहरुमा उल्लेख छ।
५२ वर्षीय असान्जमाथि राष्ट्रिय सुरक्षासँग सम्बन्धित कागजातहरू चोरेको र सार्वजनिक गरेको आरोप लागेको थियो। अमेरिकी प्रशासनले विकिलिक्सले सार्वजनिक गरेको इराक र अफगानिस्तानसँग सम्बन्धित फाइलका कारण धेरैको ज्यान खतरामा परेको आरोप लगाएको थियो ।
जुलियन असान्ज पछिल्लो ५ वर्षदेखि बेलायतको जेलमा थुनिएका थिए र उनी अमेरिकामा सुपुर्दगीको मुद्दामा आन्तरिक रूपमा लडिरहेका थिए । बीबीसीका अनुसार असान्ज अमेरिकामा हिरासतमा बस्ने छैनन्।
अदालतको पत्र अनुसार जुलियन अष्ट्रेलिया फर्किनेछन् ।
'जुलियन असान्ज स्वतन्त्र छन्,' विकिलिक्सले सोशल मिडिया प्लेटफर्म एक्समा पोस्ट गरेको छ, '१९०१ दिनको कारावासपछि उनी २४ जुन बिहान बेलमार्श जेलबाट निस्किएका हुन्। उनी लन्डन उच्च अदालतबाट जमानत पाइ स्टान्स्टेड एयरपोर्टमा पुगेका थिए।'
विकिलिक्सका अनुसार जुलियन असान्जको रिहाई विश्वव्यापी अभियान र राष्ट्रसंघमा आवाज उठाउने नेताहरूको प्रयासले सफल भएको हो।
त्यसपछि मात्र अमेरिकासँग सम्झौता हुन सफल भएको थियो। विकिलिक्सले उक्त सम्झौताको विस्तृत विवरण भने दिएको छैन।
जुलियन असान्जले कानुनी प्रक्रिया पूरा गरी बेलायत छाडेका छन् ।
