: मुस्ताङमा पर्यटक भित्र्याउनका लागि खेलकुद मेला सञ्चालन गरिएको छ। जिल्लाको स्याङ गाउँमा शनिबारदेखि सुरु भएको खिल्हा पर्वका अवसरमा खेलकुद मेला सञ्चालन गरिएको हो। खिल्हा पर्वलाई तिब्बती पात्रोको तिथिमा पर्ने स्थानीय भाषामा साउन मेलाका रुपमा लिने गरिन्छ।
घरपझोङ-३ स्याङका वडाध्यक्ष फलेन्द्रप्रसाद थकालीले बर्खे बाली भित्र्याएर खेतबारीमा उवा छरेपछि खिल्हा पर्व मनाउने प्रचलन रहेको बताए। वडाध्यक्ष थकालीका अनुसार सदिंयौदेखिको धार्मिक तथा सांस्कृतिक प्रचलन अनुसार पर्वको पहिलो दिन गाउँको १६ जना रोवा (मितज्यु)हरू लस्करै घोडा चढेर समुन्द्री सतहको ४५ सय मिटर उचाइमा अवस्थित गाउँ माथिको लेंक चाङफुई ओढारमा पुग्छन्।
पर्वको पहिलो दिन चाङफुई ओढार पुगेका १६ रोवाले पूर्णिमाको तिथिमा त्यहाँ लामा राखेर विधिपूर्वक पूजाआजा गरि पुनः गाउँ फर्किन्छन्। चाङफुई ओढारमा पूजाआजा गरी १६ रोवा गाउँ फर्किएपछि खिल्हा पर्वका अन्य गतिविधि सञ्चालन हुने वडाध्यक्ष थकालीको भनाइ छ। खिल्हा पर्व अवधिमा गाउँभित्र परम्परागत प्रचलन अनुसार याक नाच र जोगी नाचहरू देखाइने चलन रहेको वडाध्यक्ष थकालीको भनाई छ।
वडाध्यक्ष थकालीले स्याउँ गाउँको धार्मिक तथा सांस्कृतिक पर्व खिल्हा पर्वलाई गाउँले मिलेर पर्यटन प्रवर्द्धनका लागि बृहत खेलकुद मेला सञ्चालन गरिएको बताए। सधैंझैँ परम्परागत रूपमा गाउँले मात्रै मिलेर मनाइने खिल्हा पर्वलाई यसपटक स्याउ गाउँले विभिन्न खेलकुदका कार्यक्रमहरू सञ्चालन गरिरहेको छ।
साउन ५ गतेदेखि साउन ९ गतेसम्म सञ्चालन हुने खिल्हा मेलामा राष्ट्रिय तथा क्षेत्रीय र जिल्ला स्तरीय आर्चरी तथा भलिबल खेलाडीहरू मुस्ताङ आइपुगेका छन्। जनकल्याण युवा क्लब स्याङ गाउँको आयोजनामा हुने खिल्हा मेलामा भलिबल, आर्चरी, तारो हान्ने खेल, घोडा दौड तथा घोडा दौडाउँदै खादा टिप्ने लगायतका प्रतियोगिताहरू समावेश गरिएको छ।
