। प्रतीक्षित हलिउड फिल्म ‘क्याप्टेन अमेरिका : ब्रेभ न्यु वर्ल्ड’को ट्रेलर सार्वजनिक भएको छ । मार्वल स्टुडियोको यो फिल्ममा पहिलोपटक एन्थोनी म्याकीलाई क्याप्टेन अमेरिका (साम विल्सन)को भूमिकामा देख्न सकिन्छ, जहाँ उनले क्याप्टेन अमेरिकाको आइकोनिक ढाललाई प्रयोग गरिरहेका छन् ।
क्याप्टेन अमेरिका श्रृंखलाको यो चौथो भाग १२ फेब्रुअरी २०२५ मा प्रदर्शन हुँदैछ । पछिल्लोपटक सन् २०१९ को फिल्म ‘एभेन्जर्स : इन्ड गेम’मा अभिनेता क्रिस इभान्स क्याप्टेन अमेरिकाको रोलमा देखिएका थिए । उनी यो रोलबाट बाहिरिएपछि पहिलोपटक म्याकीले भूमिकालाई निरन्तरता दिएका हुन् ।
जुलियस ओनाह निर्देशित यो फिल्मको पटकथा माल्कम स्पेलम्यान, डालन मुसन र म्याथ्यु ओर्टनले लेखेका हुन् । नयाँ ट्रेलरमा दर्शकले सामले ह्यारिसन फोर्डको चरित्र, अमेरिकी राष्ट्रपति थड्डियस ‘थन्डरबोल्ट’ रोससँग अन्तरक्रिया गरेको देख्न पाउनेछन् । फोर्डको पात्र भन्छ- ‘विश्व शक्ति परिवर्तन हुँदैछ ।’
रसले क्याप्टेन अमेरिकालाई अमेरिकी एजेन्ट बनाउने प्रस्ताव राख्छन् । ट्रेलरमा अमेरिकी राष्ट्रपति भवन ह्वाइट हाउसमा हत्याको प्रयासलाई विफल पारेको पनि देखाइएको छ ।
यो ट्रेलर मार्वल कमिक्सको राक्षस पात्र रेड हल्कबाट सकिन्छ, जुन ‘थन्डरबोल्ट’ रसको अहंकारको विम्ब हो ।
‘क्याप्टेन अमेरिका : ब्रेभ न्यु वर्ल्ड’ मार्वल सिनेम्याटिक युनिभर्सको पुनरागमन पनि हो । यो फिल्मसँग धेरै परिचित अनुहार छन्, जसमा नयाँ फाल्कनको रूपमा ड्यानी रामिरेज, कार्ल लुम्ब्ली इसाईया ब्राडलीको रूपमा, इजरायली सुपरहिरो साब्राको रूपमा शिरा हास र रहस्यमय खलनायकको भूमिकामा जियानकार्लो एस्पोसिटो समावेश छन् ।
