। हरेक अमेरिकी राष्ट्रपतीय उम्मेदवारका लागि टाउको दुखाइको विषय बन्ने गर्छ- चुनावी र्यालीमा कसको गीत बजाउने ? रिपब्लिकन पार्टीका उम्मेदवार डोनाल्ड ट्रम्पले ल्याटिनो र्यापरलाई लिएर र्यालीमा सांगीतिक प्रस्तुति दिइरहेका छन् ।
हिस्प्यानिक र अश्वेत समुदायका मतदाता रिझाउन हिपहप संगीत महत्वपूर्ण माध्यम बन्ने उनको ठम्याइ छ । सुरुदेखि नै हलिउड ट्रम्पमैत्री छैन । अघिल्लो चुनावमै ट्रम्पसँग टेलर स्वीफ्ट र बियोन्सेको भनाभन परेको थियो । ट्रम्पको पक्षमा र्यापर कान्ये वेस्ट मात्र खुलेका थिए ।
कमला ह्यारिसलाई डेमोक्रेटिकतर्फबाट उम्मेदवारको रुपमा अघि सारिएपछि हलिउडले राहतको सास फेरेको छ । सेलिब्रेटीले खुलेरै ह्यारिसलाई इन्डोर्स गर्न थालेका छन् । ह्यारिसलाई उम्मेदवार घोषणा गरिएको केही घण्टाभित्रै पपस्टार बियोन्सेले सन् २०१६ को एल्बम ‘लेमोनेड’मा समावेश हिट गीत ‘फ्रिडम’ बजाउन अनुमति दिएकी छन् ।
सीएनएनका अनुसार ह्यारिस चुनावी सभामा बजिरहेको गीतबाट बाहिरिनुभन्दा अघि बियोन्सेले उनलाई आफ्नो गीत चुनावी अभियानभर बजाउन अनुमति दिएकी हुन् ।
बियोन्सेले अहिलेसम्म आधिकारिक रुपमा ह्यारिसको पक्षमा समर्थन त व्यक्त गरेकी छैनन्, यद्यपि गीत बजाउन अनुमति दिने उनको यो कार्यलाई समर्थन गर्ने एउटा चलाखी मानिएको छ । यसअघि बियोन्सेले सन् २००० मा जो बाइडेन र ह्यारिसको पक्षमा खुलेको जनाएकी थिइन् ।
सन् २०१३ मा बाराक ओबामाको दोस्रो कार्यकालको उद्घाटन र हिलारी क्लिन्टनको चुनावी र्यालीमा बियोन्सेले सांगीतिक प्रस्तुति दिएकी थिइन् ।
‘फ्रिडम’, जसमा केन्ड्रिक लामारको विशेष उपस्थिति छ । आधिकारिक रूपमा यो एकल गीत कहिल्यै रिलिज गरिएन तर एल्बममा भने यसले चर्चा पायो । सन् २०१६ मा बिलबोर्डको १०० शीर्ष सूचीको ३५ नम्बरमा गीत सूचीकृत भएको थियो ।
