। अन्तर्राष्ट्रिय क्रिकेट काउन्सिल (आईसीसी) ले सन् २०३० मा हुने महिला विश्वकप क्रिकेटमा १६ टिम सहभागी गराउने भएको छ ।
सन् २००९ मा महिला विश्वकप सुरु हुँदा ८ टिम मात्र सहभागी थिए । २०१६ मा टिमको संख्या बढाएर १० बनाइएको थियो । आउँदो अक्टोबरमा हुने २०२४ मा महिला टी–२० विश्वकपमा पनि १० टिमले सहभागिता जनाउनेछन् । २०२६ को संस्करणमा भने १२ टिम सहभागी हुनेछन् । सन् २०२६ को विश्वकप खेल्ने टिमहरु ३१ अक्टोबर २०२४ मा टुंगो लागिसक्नेछ ।
त्यस्तै पुरुष टिमको पनि २०२६ को विश्वकपमा आठ क्षेत्रीय छनोटबाट छानिएका टिमहरुले विश्वकप खेल्नेछन् । जसमा अफ्रिका र युरोपबाट २/२ टिम, अमेरिकाबाट एउटा, एसिया र पूर्वी एसिया क्षेत्र (इएपी)बाट तीन टिमले संयुक्त रुपमा विश्वकप खेल्न पाउने भएका छन् । एसियाली क्षेत्र छनोटबाट २ टिम र इएपीबाट एउटा टिमले विश्वकपमा भाग लिन पाउने भएका छन् ।
त्यस्तै, आईसीसीले अमेरिका र चिलीको क्रिकेट बोर्डलाई आईसीसीको सदस्यतासम्बन्धी नियम पालना गर्न १२ महिनाको समयसहितको आधिकारिक सूचना दिएको छ ।
अमेरिका र चिलीको समस्या समाधानका लागि अमेरिकास्थित कार्यालयले सहयोग गर्ने पनि उल्लेख छ ।
आईसीसीको सोमबार बसेको बैठकले आईसीसी विश्वकपको लागि छुट्टै रिभ्यु प्यानल पनि गठन गर्ने निर्णय गरेको छ ।
