। विश्व फिल्मको ध्यान शुक्रबार रिलिज हुन लागेको हलिउड सुपरहिरो ‘डेडपुल एण्ड वुल्भरिन’तर्फ सोझिएको छ । फिल्मले विश्व बक्स अफिसमा ३६० मिलियन डलरको ओपनिङ गर्ने प्रक्षेपण छ ।
फिल्मले हड्तालले थलिएको हलिउडलाई ठूलै ऊर्जा समेत दिने मात्र होइन, मार्वल सिनेम्याटिक युनिभर्स (एमसीयू)लाई पुनरुत्थान गर्ने अनुमान छ । न्युयोर्क प्रिमियरमा यसले एमसीयूकै अहिलेसम्मको उत्कृष्ट फिल्मको रुपमा प्रशंसा बटुलेको छ ।
जसकारण यो फिल्मको पर्खाइ नेपालमा समेत छ । नेपाली दर्शकले सामाजिक सञ्जालमा यसको प्रदर्शन मितिलाई लिएर व्यक्त गरिरहेको चासोले यसको क्रेज पुष्टि हुन्छ ।
अमेरिका, भारतसहित अन्तर्राष्ट्रिय बजारमा फिल्म शुक्रबार (जुलाई २६)मा रिलिज हुँदा नेपालमा भने सोही मितिमा नआउने भएको छ । फिल्मको नेपाल वितरक एप्पल इन्टरटेनमेन्टले साउन १८ गते (अगस्ट २)मा फिल्म आउने जनाएको छ । यसको अर्थ नेपाली दर्शकले विश्वव्यापी रिलिजको एक सातापछि मात्रै यो फिल्म हेर्न पाउनेछन् ।
फिल्ममा र्यान रेनोल्ड्स, ह्युज ज्याकम्यान, एम्मा कोरिन, मोरेना ब्याकरिन, रोब डेलाने, लेस्ली उग्गाम्स, करण सोनी, म्याथ्यु म्याकफ्याडियनको अभिनय छ ।
