। म्यानचेस्टर सिटीको पहिलो रोजाइका गोलकिपर एडरसनको भविष्य सिटीमा अनिश्चित रहेको प्रशिक्षक पेप ग्वार्डिओलाले बताएका छन् ।
उनले यो गर्मीमा एडरसन टिममा रहने कुरा अनिश्चित रहेको खुलाएका हुन् । ब्राजिलियन गोलकिपर एडरसनलाई साउदी प्रो लिगले निकै चाहिरहेको खबर आइरहेको बेला ग्वार्डिओलाको यो भनाइले निकै चर्चा बटुलेको हो ।
उनले गत सिजनको अन्त्यसम्म पनि एडरसनलाई आफ्नो पहिलो रोजाइको गोलकिपर भएको बताएका थिए । तर पनि उनले रियल म्याड्रिडसँगको खेलमा भने स्टेफन ओर्टेगालाई टिममा मौका दिएका थिए ।
सेल्टिकसँग ४–३ को हार पश्चात प्रशिक्षक भन्छन्, ‘एडरसन टिममा रहिरहोस् भन्ने म चाहन्छु तर यो कुरा अन्य क्लबमा पनि भर पर्छ ।’
‘मलाई केही पनि स्थितिको जानकारी छैन । अहिले कस्तो स्थिति छ । मसँग सम्पर्क भएको छैन । प्रशिक्षणको कुरामा हो भने हामी ट्रान्सफर विन्डो सकिँदासम्म हेर्छौं,’ प्रशिक्षक ग्वार्डिओलाले भने ।
च्यापल हिलमा भएको खेलमा एडरसन हाफ टाइममा आएका थिए । उक्त खेलमा सिटीले हार बेहोरेको थियो । यो खेल सिटीका लागि प्रिमियर लिगको प्रि सिजन खेल हो ।
तर यदि एडरसनको भविष्य सिटीमा अनिश्चित हो भने ३० अगस्टमा ट्रान्सफर विन्डो बन्द हुनु अघि फिलिप्सले क्लब छोड्ने पक्का हो । सायद उनी लोनमा अर्को क्लब जाने प्रबल सम्भावना हुन्छ ।
गत सिजन पनि फिलिप्सको प्रदर्शन निकै खराब रह्यो जसको कारण उनले युरो २०२४ मा इङ्ल्यान्डमा ग्रेथ साउथगेटको टिममा मौका पाएनन् ।
सेल्टिक विरुद्धको खेलमा पनि उनी हाफ टाइममा प्रतिस्थापन भए । तर ग्वार्डिओलमा भने उनलाई हाफ टाइममा निकाल्नुको कारण उनको चोट भएको बताउँछन् । ‘उनलाई चोट लागेको थियो, त्यसैले हामीले उनलाई धेरै मिनेट दिएनौं ।’ उनले भने ।
उनले सेल्टिकको बारेमा बोल्दै भने, ‘मलाई अहिले थाहा छैन । उनको सोच के छ । उनको सोच र अवस्था हेरेर हामी यसमा निर्णय लिनेछौं ।’
हालान्डको कप्तानीमा हार
सेल्टिक विरुद्धको खेलमा सिटीको कप्तानी इर्लिङ हालान्डले गरेका थिए ।
एर्लिङ हाल्यान्डको कप्तानीमा रहेको सिटी प्रि सिजन प्रतिस्पर्धामा सेल्टिकसँग ४–३ ले पराजित भयो । सिटीको लागि हाल्यान्डले एक गोल मात्र गरे ।
अमेरिकाको केरान मेमोरियल मैदानमा सेल्टिकले अग्रता बनाउँदै सिटीलाई हराएको हो । निकोलास गेरिटले दुई गोल गरे । केयोगो फुरुहासीले र लुइस पाल्माले समान एक गोल गरेका हुन् ।
पेप ग्वार्डिओलाको प्रशिक्षणमा सिटीको लागि हालान्डसहित ओस्कार बोब र म्याक्सिमो पेरोनले समान एक गोल गरेका थिए ।
सिटीले टोलीमा युरो र कोपा नखेलेका खेलाडीलाई समावेश गरेको छ । टोलीमा हाल्यान्डसहित ज्याक ग्रेलिस, काल्भिन फिलिप्स लगायत छन् ।
