। म्यानचेष्टर सिटीका फरवार्ड जुलियन अल्भारेजले पेरिस ओलम्पिकपछि क्लबमा आफ्नो भविष्यबारे निर्णय गर्ने बताएका छन् ।
२४ वर्षीय अल्भारेज हाल अर्जेन्टिनी टिमसँग ओलम्पिक खेल्न फ्रान्समा छन् । अर्जेन्टिनाले समूहको तेस्रो खेलमा मंगलबार लियोनमा युक्रेनसँग खेल्दैछ ।
मार्च २०२३ मा अल्भारेजले इंग्लिस क्लब म्यानचेष्टर सिटीसँग एक वर्षको सम्झौता नवीकरण गरेका थिए । त्यसको अर्थ उनी २०२८ सम्म सिटीमा बस्नुपर्नेछ ।
‘धेरै कुरा भएका छन् । म ओलम्पिकमा केन्द्रित छु किनकि यो छोटो प्रतियोगिता हो । सिटीमा म धेरै राम्रो महसुस गर्छु । मैले त्यहाँ धेरै समय खेलेको छ,’ सिटीसँगको भविष्यबारे सोध्दा उनले भने, ‘तर यस खेलपछि हेरौँ । सुरुमा यदि मैले समय पाए केही दिन छुट्टी लिनेछु । त्यसपछि हामी निर्णय लिनेछौँ ।’
सिटीले एफए कप फाइनलमा म्यानचेष्टर युनाइटेडसँग पराजित हुँदा अल्भारेज सब्सिच्युटमा थिए । त्यसपछि एट्लेटिको मड्रिडसँग उनको नाम जोडिंदै आएको छ ।
उनले ठूला खेलहरुमा आउट हुँदा रिस उठ्ने बताउँदै खेलाडीहरु सधैँ पिचमा सहयोग गर्न चाहने बताए । ‘तर मेरो सिजन राम्रो भएको थियो । त्यसेले म धेरै खुशी छु ।’
प्रि-सिजन टुरमा हाल सिटीसँग अमेरिकामा रहेका प्रशिक्षक पेप ग्वार्डिओलाले अल्भारेजले आफ्नो भविष्यको बारेमा सोचिरहेको कुरा आफूलाई थाहा भएको बताए ।
‘म प्रतिस्थापनको बारेमा सोच्दिनँ,’ ग्वार्डिओलाले थपे, ‘मलाई थाहा छ उनी महत्त्वपूर्ण क्षणहरूमा खेल्न चाहन्छ, तर अन्य खेलाडीहरू पनि त्यही चाहन्छन् । हामीसँग १८ वा १९ खेलाडी छन् जो महत्त्वपूर्ण खेलमा खेल्न चाहन्छन् ।’
‘मैले पढें कि उनले यसको बारेमा सोच्नु पर्छ, त्यसैले ठीक छ, यसको बारेमा सोच्नुहोस् र त्यसपछि उनले के गर्न चाहन्छन् भनेर हामीलाई सूचित गरोस् ।’
अल्भारेजले कम्युनिटी सिल्डमा ६ अगस्ट २०२३ मा आर्सनल विरुद्ध खेलेका थिए । पेरिस ओलम्पिकमा पुरुष फुटबलको स्वर्ण पदकको खेल ९ अगस्टमा हुनेछ ।
