गोरखा : सुत्केरी व्यथाले तीनदेखि थलिएकी उत्तरी गोरखाकी सुनमाया गुरुङको हेलिकोप्टरबाट उद्धार गरिएको छ । बुधबारदेखि सुत्केरी व्यथाले सिकिस्त भएकी चुमनुब्री- ३ सल्लेरीकी करिब ४० वर्षीया गुरुङको शुक्रबार बिहान आठबजेतिर नेपाली सेनाको हेलिकोप्टरबाट उद्दार गरिएको हो।
‘अस्तिदेखि सुत्केरी व्यथा लागेको रहेछ । हिजो आफन्तजनले उहाँलाई फिलिम स्वास्थ्यचौकी ल्याउनुभयो,'गाउँपालिकाकी उपप्रमुख लक्ष्मी गुरुङ भन्छिन्,‘बच्चाले पेटभित्रै दिसा खाइसकेको रहेछ । अवस्था जटिल हुँदै गएपछि हिजोदेखि हेलिकोप्टर मगायौँ । प्रतिकूल मौसमका कारण हेलिकोप्टर आउन सकेन । आज बिहान आठबजेतिर हेलिकोप्टर आयो र काठमाडौँ लगेको छ ।’
थापाथली प्रसूतिगृहमा शल्यक्रियाका लागि लगिएको उनले बताइन् । ‘दुर्गमका बासिन्दा,सडक राम्रो भएको भए र गाडी चलेको भए अस्ति नै अस्पताल पुगेर सुरक्षित सुत्केरी भइसकेको हुन्थ्यो’,उपाध्यक्ष गुरुङ भन्छिन्, ‘तर न गाडी चल्छ,न भनेको बेला हेलिकोप्टर आउन सक्छ । त्यसैले समयमै उपचार नपाएर धेरै ठूलो समस्या भोग्नु पर्ने बाध्यता छ ।’
सुनमायालाई राष्ट्रपति सुत्केरी महिला उद्धार कार्यक्रमअन्तर्गत उद्धार गरिएको उपाध्यक्ष गुरुङले जानकारी दिइन् ।
