। चिनियाँ मूलकी हलिउड अभिनेत्री मिसेल योहको पाण्डोरा ग्रहको भ्रमण पक्का भएको छ । उनी प्रतीक्षित ब्लकबस्टर फिल्म ‘अवतार’को चौथो र पाँचौं श्रृंखलामा देखिने भएकी छन् ।
निर्देशक जेम्स क्यामरुनले ती श्रृंखलामा अभिनेत्री योहले डा. करिना मोग नामक वैज्ञानिकको भूमिका निर्वाह गर्ने जनाएका छन् । योहले अवतारको तेस्रो श्रृंखला ‘फायर एण्ड एस’मा अभिनय गर्ने चर्चाबीच निर्देशक क्यामरुनको प्रष्टीकरण आएको हो ।
‘मिसेल योह ३ मा हुनेछैनन् । उनी चौथो र पाँचौं श्रृंखलामा देखिनेछिन्,’ निर्देशक क्यामरुनले भने ।
सन् २०२१ मा फिल्मको सुटिङ सेटमा उपस्थित अभिनेत्री योहसँगको फोटो सेयर गर्दै दिवंगत निर्माता जोन लान्डाउले यसबारे संकेत दिएका थिए । लगत्तै योह तेस्रो सिक्वेलमा देखिने अड्कलबाजी चलेको थियो ।
क्यामरुनले सन् २०२२ मा दोस्रो भाग ‘अवतार : द वे अफ वाटर’सँगै तेस्रो श्रृंखला ‘फायर एण्ड एस’ र ‘अवतार ४’ का भाग खिचेका थिए ।
‘उनी चाँडै नै आफ्नो भाग गर्न आउँदैछिन्, जुन एक रोचक, रमाइलो चरित्र हो,’ क्यामरनले इन्टरटेनमेन्ट विक्ली म्यागेजिनलाई भने, ‘मेरो मतलब, हामी अब आफैं अगाडि बढ्दैछौं । यो सबै कुरा वर्षौंका लागि योजना गरिएको छ । स्क्रिप्ट सबै यसै वर्षको सुरुवातमा लेखिएका थिए । त्यसैले हामीले चारै भागमा काम गरिरहेका छौं ।’
‘हामी मिसेललाई माया गर्छौं,’ निर्देशकले भने, ‘उनी सधैं फिल्म स्टार हुन् । म उनीसँग काम गर्न उत्साहित छु ।’ अवतार ३ सन् २०२५ को क्रिसमस छेकोमा डिसेम्बर १९ मा प्रदर्शन हुनेछ ।
‘अवतार ४’ डिसेम्बर २१, २०२९ र ‘अवतार ५’ डिसेम्बर १९, २०३१ मा रिलिज हुनेछन् ।
