। संसारको सबैभन्दा पुरानो र प्रतिष्ठित मानिने भेनिस फिल्म फेस्टिभलको ८१ औं संस्करण बुधबार इटालीमा सुरु हुँदैछ । हलिउड फिल्म र स्टारको जमघट फेस्टिभलमा हुनेछ ।
फेस्टिभलको ओपनिङ फिल्मको रुपमा ‘बिटलजुइस बिटलजुइस’ छ जसको विश्वव्यापी रिलिज अर्को साता हुँदैछ । ११ दिने फिल्म फेस्टिभल सेप्टेम्बर ७ सम्म चल्नेछ ।
हलिउडका ठूला स्टारको जमघट हुने भएपछि भेनिसमा चल्ने पानी ट्याक्सी भरिभराउ हुने पक्का छ । एन्जेलिना जोली, लेडी गागा, जर्ज क्लुनी, ब्राड पिट, केट ब्लान्चेट, डेनियल क्रेग, टिल्डा स्विन्टन, जुलियाना मुर्रे, केभिन कस्टनर, जुड ल, जोकिन फिनिक्स फेस्टिभलमा उपस्थित हुनेछन् ।
हलिउड हड्तालका कारण गत वर्षको संस्करण प्रभावित भएको थियो । हड्ताल टुंगिएपछि यस वर्ष भेनिसलाई ठूलै राहत मिलेको छ । तर यसपटक ह्यारी स्टाइल, तिमोथी चालमेट जस्ता किशोर स्टार भने हुनेछैनन् ।
भेनिसको शीर्ष उपाधिका लागि हुने प्रतिस्पर्धा रोचक हुने पक्का छ । जसमा टोड फिलिप्सको ‘जोकर : फोली ए ड्यूक्स’, पाब्लो लरेनको एन्जेलिना जोली स्टारर ‘मारिया’, किडम्यान र ह्यारिस डिकिन्सन अभिनित ‘बेबीगर्ल’, लुका गुआडाग्निनोको ‘क्वियर’, क्रेग र जेसन श्वार्ट्जम्यानको पहिलो अंग्रेजी भाषाको फिल्म ‘द रुम नेक्स्ट डोर’ छन् ।
यहाँ केही ठूला हलिउड फिल्म पनि प्रतिस्पर्धाबाट बाहिर छन्, जसमा पिट र क्लुनीको वुल्फ्स’, ‘होराइजन : एन अमेरिकन सागा–चेप्टर २’ र ‘बिटलजुइस बीटलजुइस’ छन् ।
भेनिसमा देखाइने फिल्मले कान्स र टोरन्टोमा प्रतिस्पर्धा गर्न लामै समय कठिन रह्यो । तर केही महत्वपूर्ण फिल्म र स्टार थिए, जसले केहील ओस्कार मनोनयन र जितको अवसर पाए । जब ‘ग्राभिटी’ भेनिसमा प्रिमियर भयो, यसले अस्करका प्रमुख ७ विधा जित्यो जसले भेनिस अस्करको अभियान थालनी गर्ने थलोको रुपमा विकास भयो ।
एकेडेमीको सदस्यता थप अन्तर्राष्ट्रिय भएकाले यसले तीव्रता पाएको छ । सन् २०१९ यता भेनिसमा प्रिमियर भएका बर्डम्यान, स्पटलाइट, द सेप अफ वाटर र नोम्याडल्याण्ड अस्करमा उत्कृष्ट फिल्म बने भने १९ वटा मनोनयन भए । भेनिसमा यस वर्ष २१ फिल्म प्रतिस्पर्धामा छन् ।
इसाबेल हपर्ट जुरी प्रमुखको रुपमा छिन् । जेम्स ग्रे, एन्ड्रयू हेग, एग्निएस्का हल्यान्ड, क्लेबर मेन्डोन्सा फिल्हो, अब्देररहमाने सिसाको, ज्युसेप्पे टोर्नाटोर, जुलिया भोन हेन्ज र झांग जिइ जुरी सदस्य छन् ।
नेपाली फिल्म ‘पूजा, सर’ भेनिसमा २९ अगस्टमा वर्ल्ड प्रिमियर हुने कार्यक्रम छ ।
