। श्रीलंकाले दोस्रो टेस्ट खेलमा न्युजिल्यान्डविरुद्ध मजबुत ब्याटिङ सुरुवात गरेको छ । गालेमा टस जितेर पहिला ब्याटिङ रोजेको श्रीलंका पहिलो दिन ३०६–३ को अवस्थामा छ ।
दिनेश चान्डिमलले २०८ बलमा १६ चौकासहित ११६ रनको शतकीय इनिङ खेले । टेस्ट करिअरको १६ औं शतक हानेका उनी ग्लेन फिलिप्सको बलमा बोल्ड आउट भए । ओपनर पाथुम निसांका १ र दिमुथ करुणारत्नले ४६ रनमा आउट भए । दिमुथले दोस्रो विकेटका लागि दिनेश चान्डिमलसँग १२२ रनको साझेदारी गरेका थिए ।
एन्जिलो म्याथ्युज १६६ बलमा ६ चौकासहित ७८ तथा कामिन्दु मेन्डिस ५६ बलमा ८ चौका र १ छक्कासहित ५१ रनमा नटआउट छन् । योसँगै कामिन्दु टेस्ट डेब्यूको सुरुवाती आठै खेलमा अर्धशतक प्रहार गर्ने पहिलो खेलाडी बनेका छन् ।
उनले पाकिस्तानका साउद सकिलको सुरुवाती ७ टेस्टमा लगातार अर्धशतकको कीर्तिमान तोडेका हुन् । पहिलो खेलमा श्रीलंका ६३ रनले विजयी भएको थियो । दुई खेलको सिरिजमा श्रीलंका १–० ले अघि छ ।
