। नेपाल प्रिमियर लिग (एनपीएल) को अक्सन आइतबार काठमाडौंमा सम्पन्न भएको छ । अक्सनमा लुम्बिनी लायन्स, जनकपुर बोल्ट्स र कर्णाली याक्स भाग्यमानी मानिए ।
रोहित पौडेल मार्की र शक्ति गौचन कन्सल्टेन्स प्रशिक्षक रहेको लुम्बिनीले ए ग्रेडका तीन खेलाडी लक्की ड्र मार्फत पाएको थियो । स्पिनर सूर्य तामाङ, विवेक यादव र सन्दीप जोरालाई उच्चतम १५ लाखमा लक्की ड्रमा लुम्बिनी भित्र्याउन सफल भयो ।
बायाँ हाते स्पिन सूर्यले घरेलु क्रिकेटमा लगातार उत्कृष्ट बलिङ गर्दै आएका छन् । विवेक फिनिसरसँगै तीव्र गतिका बलर हुन् । सन्दीप जोरा मध्यक्रमका ब्याटर हुन् । विवेक र सन्दीप दुबै टी–२० विशेष खेलाडी मानिन्छन् ।
लुम्बिनीले त्यति मात्रै होईन, ग्रेड बी का आशुतोष घिरैया र स्पिनर तिलकराज भण्डारीलाई पनि उच्चतम मूल्य १० लाखमा लक्की ड्र मा पाउन सफल भयो ।
‘हामीले अक्सनमा जे सोचेका थियौं त्यस्तै भयो । ए ग्रेडका तीनै खेलाडी पाउनु सौभाग्य हो । आइतबार दशैंको चौथो दिन र चार नम्बर मलाई जहिले पनि फाप्छ’, लुम्बिनीका मालिक ईश्वर जी.सीले भने ।
अक्सनमा लुम्बिनीले गुल्सन झालाई मूल्य नै लगाउन पाएन । किनभने उनको नाम आउनु अघि नै ए ग्रेडका तीन खेलाडी पुगेका थिए ।
‘गुल्सनलाई एकदमै ठूलो मिस गर्यौ । सबैभन्दा बढी आज अक्सनमा हर्षितका पलहरु धेरै थिए । एउटा धेरै ठूलो मन दुखाइ भनेको गुल्सनलाई मूल्य लगाउन नपाउनु थियो’, जी.सीले भने ।
लुम्बिनीको ब्याटिङमा रोेहित, विवेक, सन्दीप, आशुतोष र अर्जुन साउद छन् । विकास आग्री, दिनेश अधिकारी र दुर्गेश गुप्ता तीव्र गतिका बलर हुन् । स्पिनरमा सूर्य, तिलक र अभिषेक गौतम छन् ।
लुम्बिनीमा भएका तीनै तीव्र गतिका बलरले नेपालको टोलीबाट खेलेका छैनन् । घरेलुमा मात्रै अनुभव हुँदा तीव्र गतिका बलिङ कमजोरी देखिन्छ । उक्त स्थानमा विदेशी खेलाडीबाट पुर्ती गर्ने जि.सी बताउँछन् ।
उता कर्णाली याक्सले सबैले चाहेको तीव्र गतिका बलर गुल्सन झालाई पायो । गुल्सन तीव्र गतिसँगै तल्लोक्रममा राम्रो प्रदर्शन गर्ने गर्दछन् । अर्कोतर्फ आफ्नै स्थानीय विकेटकिपर ब्याटर अर्जुन घर्तीलाई पनि लक्की ड्र मार्फत १० लाखमा पाएको थियो । कर्णालीबाट घरेलु क्रिकेट खेल्ने अर्जुनलाई किन्न काठमाडौं, विराटनगर र कर्णाली अक्सनमा भिडेका थिए ।
कर्णालीको टोली सन्तुलित देखिन्छन् । तीव्र गतिका बलरमा सोमपाल कामी, गुल्सन झा र नन्दन यादव छन् । गुल्सन र सोमपाल पहिलो रोजाईका नेपाली खेलाडी हुन् । नन्दन अष्ट्रेलियामा रहेर निरन्तर अभ्यास गरेका छन् । अवको नेपालको भविष्य मानिन्छन् ।
भुवन कार्की, युनिस विक्रम सिंह, दीपेन्द्र रावत, मौशम ढकाल छन् । ब्याटिङमा देव खनाल, अर्जुन घर्ती, रित गौतम र दीपक डुम्रे छन् । त्यसैले कर्णाली ब्याटिङमा कमजोर देखिन्छ ।
‘अक्सन राम्रो नै भयो । सुरुवातमा राम्रो भएको थिएन । लक्की ड्र मा ७ मा नै गुमायौं । तर दोस्रो हाफ हाम्रो लागि एकदमै लाभदायी रह्यो,’ कर्णालीका निर्देशक तथा मुख्य प्रशिक्षक ज्ञानेन्द्र मल्लले भने ।
‘ब्याटिङमा अलराउण्डरको रुपमा हेर्ने हो भने हामीसँग स्टेन्थपनि छ । गुल्सन र सोमपालबाट आशा गर्न सकिन्छ । ब्याटिङ अलीकति कमजोर देखिन्छ । तर उपाधि जित्नु छ भने हाम्रो खेलाडी नै चल्न आवश्यक छ’, ज्ञानेन्द्र मल्लले भने, ‘ए क्याटेगोरीका ब्याटर पर्खे पनि पाएनौं । विदेशी खेलाडी अब त्यही अनुसार ल्याउँछौं ।’
गुल्सन मात्रै नभएर सबै खेलाडी त्यति नै योग्य रहेको मल्ल बताउँछन् । ‘गुल्सन टोलीमा हुनु एकदमै राम्रो हो । तर अरुपनि खेलाडी त्यति नै योग्य नै छन् । क्रिकेटमा नामले मात्रै काम गर्दैन । हामी प्रदर्शनको अपेक्षा गर्दछौं,’ उनले भने ।
उता जनकपुर बोल्ट्स पनि अक्सनमा भाग्यमानी देखियो । सबै टोलीले मूल्य लगाएको विकेटकिपर अनिल साहलाई लक्की ड्र मार्फत १५ लाखमा पाएको थियो ।
त्यति मात्रै होइन स्पिनर ललित राजवंशी पनि लक्की ड्र मार्फत १५ लाखमा पायो । मधेशबाट घरेलु क्रिकेट खेल्ने तीव्र गतिका बलिङ अलराउण्डर रुपेश सिंहलाई पनि जनकपुरले लक्की ड्रमा १० लाखमा पाएको थियो ।
‘एक दुई जना पुरानो खेलाडीलाई हामीले लिन सकेनौं । हामीले लक्षित गरेका धेरै खेलाडी पायौं । खुसी छौं । अनिललाई पाउँदा एकदमै लक्की मान्छौं’, जनकपुरका मालिक उत्सव सिंग्देलले भने ।
लुम्बिनीसँग ब्याटरमा अनिल साह, आसिफ शेख, शुभ कंस्कार र आकाश त्रिपाठी छन् । शीर्षक्रम राम्रो हुँदा मध्यक्रम र फिनिसरमा भने विदेशी खेलाडीबाट पूर्ति गर्नुपर्ने हुन्छ ।
‘ठूला नाम भन्दा पनि खेलाडीलाई बिग बनाउने सोच राख्छौं । हाइलाइट भन्दा पनि उदयमान विदेशी खेलाडी देख्न पाइन्छ । हाम्रो अमेरिकाको बेस हुँदा केही खेलाडी त्यहाँबाट आउँछन्’, उत्सवले भने ।
