। बहुचर्चित फिल्म ‘ओपेनहाइमर’बाट गतवर्ष अस्कर अवार्ड जितेका निर्देशक क्रिस्टोफर नोलनले नयाँ फिल्ममा युनिभर्सल स्टुडियोसँग सहकार्य गर्ने पक्का भएको छ ।
भेराइटी म्यागजिनका अनुसार ‘ओपेनहाइमर’ र ‘इन्टरस्टेलर’जस्ता फिल्ममा अभिनय गरेका स्टार अभिनेता म्याट डेमन शीर्ष भूमिकामा देखिन सक्छन् ।
नोलनकै पटकथा लेखन रहने यो फिल्मको निर्माणमा उनले एम्मा थोमससँग सहकार्य गर्ने र फिल्म सिन्कोप ब्यानरमा निर्माण हुने जनाइएको छ । ब्लकबस्टर ‘ओपेनहाइमर’ले सन् २०२४ को अस्करमा ७ विधा जितेको थियो भने विश्वब्यापी ९५८ मिलियन डलर कमाएको थियो ।
युनिभर्सलसँग नोलनको सहकार्यको चर्चा भैरहँदा यो खबर बाहिरिएको हो । स्रोतले भेराइटीलाई जनाएअनुसार युनिभर्सलले यो फिल्मलाई जुलाइ १७, २०२६ मा आइम्याक्ससहितका संस्करणमा रिलिजको तयारी गरेको छ । यद्यपि, कथावस्तुबारे युनिभर्सलले केही खुलाएको छैन ।
२० वर्षपछि ‘ओपेनहाइमर’ वार्नर ब्रोज स्टुडियो बाहिर नोलनको पहिलो फिल्म हो । वार्नर ब्रोजका लागि उनले सुपरहिट फिल्महरु ‘डार्कनाइट’, ‘डन्क्रिक’, ‘इनसेप्सन’जस्ता फिल्म निर्देशन गरेका छन् ।
