। साफ वुमन्स च्याम्पियनसिप २०२४ मा श्रीलंकाले शुक्रबार माल्दिभ्सलाई १-० ले पराजित गरेको छ ।
त्रिपुरेश्वरस्थित दशरथ रंगशालामा भएको समूह बीको पहिलो खेलमा श्रीलंकालाई जित दिलाउन इमेँ अनुराधिनीले निर्णायक गोल गरिन् ।
खेलको १७औ मिनेटमा इमेसा अनुराधिनीले गोल गर्दै श्रीलंकालाई अग्रता दिलाईन् । पि एम परेराले दिएको क्रसमा बक्स भित्र अनमार्क रहेकी अनुराधिनीले हेड मार्फत गोल गरेकी हुन् ।
श्रीलंकाले खेलको दोस्रो हाफमा पनि गोल गर्ने केही अवसर बनाएको थियो तर सदुपयोग गर्न सकेन । माल्दिभ्सले भने खृल अवधिभर खासै आक्रमण गर्न सकेन।
श्रीलंकाले सन् २०१९ पछि साफ वुमन्स च्याम्पियनसिपमा पहिलो पटक गोल गरेको र खेल जितेको हो। सन् २०१९ मा विराटनगरमा भएको पाँचाै साफमा श्रीलंकाले माल्दिभ्सलाई २-० ले पराजित गर्दा श्रीलंकाका लागि चालिनीले दुवै गोल गरेकी थिइन्।
श्रीलंका साफ च्याम्पियनसिपमा चार खेलपछि पहिलो पटक गोल गरेको हो ।यस्तै श्रीलंकाले सन् २०१६ मा माल्दिभ्ससँग व्यहोरेको हारको बदला समेत लिएको छ ।
सन् २०१६ मा माल्दिभ्सले श्रीलंकालाई समूह चरणमा ५-२ ले परनजित गरेको थियो । माल्दिभ्सले साफ वुमन्स च्याम्पियनसिपमा गोल नगरेको खेल संख्या ७ पुगेको छ ।
माल्दिभ्सले पछिल्लो पटक सन् २०१६ मा भारतको सिलगुरीमा भएको चौथो साफमा समूह चरणमा भुटान विरुद्ध अन्तिम पटक गोल गरेको थियो ।
श्रीलंका कोच एमएच रुमीले आफू खेलाडीको प्रदर्शनबाट खुशी रहेको बताए । उनले भने, ‘हामीसँग तयारीका लागि थोरै समय थियो । तर खेलाडीको प्रदर्शनबाट खुशी छु । म टिम खेलाडी सपोर्टिङ स्टाफ प्रति आभारी छु।’
आफू खेलबाट सन्तुष्ट रहेको भन्दै उनले भुटानविरुद्ध खेलमा राम्रो प्रदर्शन गर्ने तयारी रहेको बताए । ‘म सन्तुष्ट छु आजको खेलबाट । हामीले यू१७ ब्वाईज टिमसँग अभ्यास खेल खेलेका थियौ,’ उनले भने, ‘अर्को खेलका लागि २ दिन छ । त्यसमा हामी काम गर्नेछौं। हामी अर्को खेलमा भुटान विरुद्ध राम्रो खेल्ने प्रदर्शन गर्नेछौं।’
यता, माल्दिभ्सका कोच मोहमेद निजमले खेलाडीका लागि नयाँ सिकाइ भएको बताए । खेलाडीहरू ३ वर्षदेखि प्रतिस्पर्धात्मक खेलमा भाग लिन नपाउको उनको भनाइ थियो।
उनले भने, ‘खेलाडीका लागि नयाँ भयो । ३ वर्षदेखि प्रतिस्पर्धात्मक खेल थिएन । यू१४ सँग अभ्यास खेल मात्रै खेलेका थियौं हामीले।’
अब आउँदो खेलमा धेरै ठाउँमा सुधार गर्नुपर्ने ठाउँ रहेको भन्दै खेलाडीहरू भावुक सुनिएको उनले बताए । ‘धेरै सुधार गर्ने ठाउँ छ। खेलाठीहरु यो खेल जित्न चाहन्थे त्यही भएपछि खेलपछि उनीहरु भावुक देखिउका छन्।’ कोच निजमले भने ।
उनले हरेक टिम फरक भएकाले आउँने म्याचमा राम्रो तयारी गरेर खेल्ने बताए । ‘हरेक टिम फरक हुन्छ । नेपाल घरेलु टिम हो । हामी दुई दिन तयारी गर्छौं र राम्रो भएर आउनेछौं।’ उनले भने ।
