९० को दशकमा भारतीय अभिनेत्रीले प्रतिफिल्म एक करोड भारु पारिश्रमिक पाउँथे । यसले उनीहरुको विज्ञापन इन्डोर्समेन्ट र सम्पत्तिको वृद्धिमा फाइदा पुग्थ्यो ।
सफल व्यवसाय गरेका ती अभिनेत्री करोडपति पनि बने । यसरी धनाढ्य बनेका अभिनेत्री शीर्ष १० को सूचीमा समावेश हुनु नौलो कुरा रहेन । अचम्म मान्नुपर्ने कुरा के छ भने जसले पछिल्लो दशकमा एउटा पनि हिट फिल्म दिन सकेको छैन, उनै अभिनेत्री ४ हजार ६०० करोड भारु (५८० मिलियन डलर)सहित भारतकी धनी अभिनेत्री घोषित भएकी छन् ।
पछिल्लो विवरणअनुसार अहिलेका चर्चित अभिनेत्रीलाई उछिन्दै जुही चावला यतिबेला भारतकी सबैभन्दा धनाढ्य अभिनेत्री बनेकी छन् । ‘हुरुन रिच लिस्ट २०२४’ को सूचीमा चुहीको सम्पत्ति उनका साथी तथा व्यावसायिक साझेदार शाहरुख खानपछि दोस्रो स्थानमा छ ।
उनको यो सम्पत्ति उनका समकालीन वा जुनियरको भन्दा धेरै हो । जुहीपछिका धनी अभिनेत्रीको सम्पत्ति जोड्दा समेत जुहीको सम्पत्तिभन्दा धेरै हुन आउँछ । जुहीपछि दोस्रो स्थानमा १०० मिलियन डलर (८५० करोड भारु)सहित ऐश्वर्या राय छिन् ।
ब्राण्ड, फिल्म निर्माण कम्पनी र हलिउड फिल्मको पारिश्रमिक जोड्दा तेस्रो स्थानमा अभिनेत्री प्रियंका चोपडा छिन् । उनको कुल सम्पत्ति ६५० करोड भारु छ । शीर्ष पाँच धनाढ्य भारतीय अभिनेत्रीमा आलिया भट्ट र दीपिका पादुकोण पनि छन्, जोसँग ठूला व्यावसायिक उद्यम पनि छन् ।
जुही कसरी धनी भइन् ?
जुही चावलाको सम्पत्तिको स्रोत फिल्म हो तर आंशिक मात्रै । यद्यपि उनी ९० को दशकमा शीर्ष स्टारमध्ये एक थिइन् । जुहीको पछिल्लो फिल्म ‘लक बाइ चान्स’ सन् २००९ मा प्रदर्शन भएको थियो ।
उनको सम्पत्तिको ठूलो हिस्सा उनको व्यापारमा हुने लगानीबाट आउँछ । उनको मुख्य आम्दानी रेड चिलिज समूहको प्रमुख लगानीकर्तामध्ये एक हो ।
कम्पनीको संस्थापकमध्ये एकको रूपमा, जुही एक सहनिर्माता र धेरै क्रिकेट टोली (आईपीएलको कोलकाता नाइट राइडर्ससहित) को सहमालिक हुन् । उनीसँग धेरै घर जग्गाको स्वामित्व छ । उनले करोडपति व्यापारी पति जय मेहता लगायतसँग संयुक्त रुपमा व्यवसायमा पनि लगानी गरेकी छन् ।
