— नेपाल प्रिमियर लिग (एनपीएल) को फ्रेन्चाइज टोली पोखरा एभेन्जर्सले नेदरल्यान्ड्सका क्रिकेटर बास डी लिडलाई अनुबन्ध गरेको छ । पोखराले भित्र्याएका उनी दोस्रो विदेशी खेलाडी हुन् । यसअघि अमेरिकाका आन्द्रेस गौसलाई अनुबन्ध गरेको थियो ।
राष्ट्रिय टोलीका ओपनर कुशल भुर्तेल मार्की रहेको पोखरामा अनुबन्धित २४ वर्षीय लिडले नेदरल्यान्ड्सबाट ३८ ट्वान्टी–२० अन्तर्राष्ट्रियमा ६ सय ९७ रन बनाइसकेका छन् ।
लिडलाई अनुबन्ध गरेपछि आफ्नो टोली बलियो भएको विश्वास पोखरा टिमका अध्यक्ष सुवोध त्रिपाठीको छ । टिमका प्रबन्ध निर्देशक मनोबल श्रेष्ठले विदेशी खेलाडीलाई समेट्दै टिम बलियो बनाउने योजना रहेको बताए ।
पोखराले अक्सनबाट सागर ढकाल, आकाश चन्द, किरण कुमार ठगुन्ना, नारायण जोशी, बिपिन खत्री, दिलीप नाथ, तृतराज दास, सुनम गौतम, दिनेश खरेल र अमृत गुरुङलाई लिएको थियो । एनपीएल मंसिर १५ देखि पुस ६ सम्म हुनेछ ।
कर्णाली याक्समा पाकिस्तानी हुसैन
हिमालयन विल्डर्स एन्ड इन्जिनियर्सको स्वामित्वमा रहेको कर्णाली याक्सले टेस्ट राष्ट्र पाकिस्तानका अलराउन्डर मोहम्मद हुसैन तलात अनुबन्ध गरेको छ ।
कर्णाली याक्समा निर्देशक गृहेन्द्र घिमिरेले हुसैन अनुबन्ध भएको बताएका छन् । ‘आगामी लिगको लागि कर्णाली याक्सले पाकिस्तानका अलरान्डर मोहम्मद हुसैन तलातलाई अनुबन्ध गरेको छ,’ घिमिरेले भनेका छन्, ‘तलातको आगमनले टोली थप बलियो बन्ने विश्वास छ ।’
ज्ञानेन्द्र मल्ल प्रशिक्षक रहेको कर्णाली याक्सको मार्की खेलाडीमा राष्ट्रिय टिमका अलराउन्डर सोमपाल कामी छन् ।
कर्णाली याक्सले पहिलो विदेशी खेलाडीको रूपमा २८ वर्षीय तलातलाई अनुबन्ध गरेको हो । उनी हालसम्म टेष्ट राष्ट्रबाट नेपाल प्रिमियर लिग (एनपिएल) मा अनुबन्ध हुने पहिलो खेलाडी बनेका छन् । उनले पाकिस्तानबाट १८ टी–२० आई खेलेका छन् । त्यसमा ३९४ रन बनाएका छन् ।
कर्णाली याक्सले अक्सनबाट राष्ट्रिय टोलीका गुलसन झा, देव खनाल र नन्दन यादव, अर्जुन घर्ती, रित गौतम, मौसम ढकाल, भुवन कार्की, दीपेन्द्र रावत, युनिशविक्रम सिंह ठकुरी, दीपक डुम्रे लिएको थियो ।
