। दक्षिण अफ्रिकाका अनुभवी तीव्र गतिका बलर मर्चेन्ट डी ल्याङलाई चितवन राइनोजले अनुबन्ध गरेको छ । १४५ किलोमिटर प्रतिघन्टा बलिङ गर्नसक्ने ३४ वर्षीय ल्याङलाई चितवनले नेपाल प्रिमियर लिग (एनपीएल) का लागि चितवनले अनुबन्ध जनाएको छ ।
६.७ फिट उचाइ भएका दायाँ हाते ब्याट्सम्यान तथा बलर विश्व फ्रेन्चाइजी क्रिकेटमा प्रभावकारी खेलाडी मानिन्छन् । उनले यस फर्म्याटका १५१ टी–२० खेल खेलेका छन् । ग्ल्यामोर्गन, समरसेट र ग्लुसेस्टरसायरजस्ता टोलीबाट काउन्टी क्रिकेट खेलेको उनीसँग अनुभव छ ।
त्यसैगरी, मुम्बई इन्डियन्स, कोलकाता नाइट राइडर्स, इस्लामाबाद युनाइटेड, गुयाना अमेजन वारियर्स, ट्रेन्ट रकेट्स, डम्बुला गेन्ट्सलगायत विश्वस्तरिय फ्रेन्चाइज टोलीको समेत उनले प्रतिनिधित्व गरिसकेका छन् ।
सन् २०११ मा श्रीलंकाविरुद्धको टेस्ट डेब्यु गरेका उनले डेब्यु खेलमै सात विकेट लिएका थिए। ल्याङले दक्षिण अफ्रिकाका लागि २ टेष्ट, ४ ओडिआई र ६ टी२०आई खेल खेलेका छन् ।
उनलाई सीमित ओभरको क्रिकेटका कारण बढी सम्झिने गरिन्छ । सन् २०१२ मा न्युजिल्यान्डविरुद्ध उनले टी–२० आई डेब्यु गरेका थिए ।
‘नेपाल प्रिमियर लिगमा चितवन राइनोजको प्रतिनिधित्व गर्न पाउँदा र विश्वका सबैभन्दा जोसिलो फ्यानहरूको अगाडि खेल्न पाउँदा म रोमाञ्चित छु । सुन्दर सहर चितवन र हिमाली राष्ट्र नेपालको यो मेरो पहिलो भ्रमण हुनेछ,’ मर्चेन्ट डी ल्याङले भनेका छन् ।
चितवन मेडिकल कलेजको स्वामित्वमा रहेको चितवन राइनोजका प्रबन्ध निर्देशक आयुश न्यौपानेले अनुभवी विदेशी बलर अनुबन्ध गर्न पाउँदा उत्साहित रहेको बताए । ‘ल्याङ ठूलो खेलाडी हुन्। उनलाई अनुबन्ध गर्न पाउँदा हामी उत्साहित छौं। उनी जस्तो कोही उपलब्ध छ भने छनोट गर्नु ठूलो कुरा होइन। उनको आगमन नेपाली क्रिकेट समर्थकलाई धेरै रोमाञ्चक अनुभव हुनेछ,’ उनले भनेका छन् ।
कुशल मल्ल मार्की प्लेअर रहेको चितवन राइनजोजको मुख्य प्रशिक्षकमा नेपाली राष्ट्रिय टिमका पूर्व प्रशिक्षक उमेश पटवाल छन् । डी ल्याङ एनपीएलका लागि अनुबन्ध हुने तेस्रो टेष्ट क्रिकेटर हुन् ।
यसअघि पोखरा राइनोजले वेष्ट इन्डिजका एण्डरसन फिलिपि र जनकपुर बोल्ट्सले न्युजिलायण्डका जेम्स निसमलाई अनुबन्ध गरिसकेको छ । यस बाहेक कर्णाली याक्सले अनुबन्ध गरेको पाकिस्तानका हुसेन तलातले टी२०आई मात्र खेलेका छन् ।
लुम्बिनी लायन्स र सुदूरपश्चिम रोएल्सले टेष्ट राष्ट्रका खेलाडी अनुबन्ध गरेपनि उनीहरुले टेष्ट खेलेका छैनन् । लुम्बिनीले इंग्लिस विकेटकिपर टम मुर्स र सुदूरपश्चिमले इंग्ल्याण्डका सेफ अली जैबलाई अनुबन्ध गरेको छ ।
आगामी मंसिर १५ देखि पुस ६ गतेसम्म हुने एनपीएलको पहिलो संस्करणमा ८ फ्रेन्चाइज टोलीले प्रतिस्पर्धा गर्नेछन् ।
