। पोखरा एभेन्जर्सले दक्षिण अफ्रिकी लेजेण्ड जोन्डी रोड्सलाई मेन्टर नियुक्त गरेको छ ।
नेपाल प्रिमियर लिग (एनपीएल) का लागि पोखराले जोन्टीलाई तीन वर्षको लागि सम्झौता गरेको पोखराले शुक्रबार विज्ञप्तीमार्फत जनाएको छ ।
यससँगै उनी नेपाल प्रिमियर लिगको पहिलो संस्करणमा जोडिने सबैभन्दा ठूलो विदेशी नाम बनेका छन् ।
एनपीएलको सबैभन्दा महँगो फ्रेन्टाइज टिम पोखरा एभेन्जर्सका सञ्चालक मनोबल श्रेष्ठले पूर्व दक्षिण अफ्रिकी क्रिकेटर रोड्सलाई नेपाल प्रिमियर लिगको लागि आफ्नो टीमको परामर्शदाता र सल्लाहकारका रूपमा नियुक्त गरेका हुन् ।
रोड्सले यसअघि भारतीय क्रिकेटर र कोच सन्दीप पाटिलले सम्हालेको भूमिका अब सम्हाल्नेछन् ।
सञ्चालक श्रेष्ठले भने, ‘उहाँलाई हाम्रो टिममा पाउँदा निकै उत्साहित छौं । उहाँको अनुभवले पोखरा एभेन्जर्सको भविष्यलाई झन् चम्किलो बनाउनेछ । युवाहरूको क्षमतामा वृद्धि गर्न सहयोग पुर्याउनेछ ।’
विश्व क्रिकेटमा उत्कृष्ट फिल्डिङका कारण परिचित जोन्टी रोड्स यसअघि पनि नेपाल आएका थिए । उनले इन्डियन प्रिमियर लिगमा पनि विभिन्न फ्रेन्चाइज टिमसँग काम गरिसकेका छन् । उनले यसअघि धनगढी प्रिमियर लिगमा गुडविल एम्बासडरको रुपमा काम गरेका थिए ।
रोड्स, जसले मुम्बई इन्डियन्स र लखनऊ सुपर जायन्ट्ससँग काम गरेका छन् । पोखराको मेन्टरमा नियुक्त भएपछि रोड्सले भने, ‘यस टिममा हुन पाउँदा म उत्साहित छु । अब म मेरो सीप र अनुभव मार्फत सम्पूर्ण खेलाडी र प्रमुख कोच राजिव कुमारलाई सहयोग गरेर टिमलाई बलियो बनाउन प्रयास गर्नेछु ।’
उनले उद्देश्यअनुसार जान सकिए खेल सकिँदासम्म प्रत्येक खेलाडी उत्कृष्ट हुने विश्वास लिएका छन् । रोड्सले केही वर्षअघि नेपालको राष्ट्रिय टिम र उमेर समूहको टोलीलाई छोटो प्रशिक्षण दिएका थिए। हाल उनी आईपीएलको लखनउ सुपरजायन्ट्ससँग आवद्ध छन् ।
५५ वर्षीय रोड्सले दक्षिण अफ्रिकाका लागि ५२ टेष्ट र २४५ ओडिआई म्याच खेलेका थिए । जोन्टीको अनुभव र विशेषज्ञता टोलीका लागि महत्त्वपूर्ण हुने पोखराको विश्वास छ ।
उनी पोखरा एभेन्जर्समा समावेश गरिनुले नेपालको क्रिकेटमा नयाँ युगको सुरुवातको संकेत मानिएको छ । रोड्सको अनुभवले टोलीको प्रदर्शनलाई सुधार्ने र युवा खेलाडीहरूको विकासमा ठूलो योगदान गर्ने अपेक्षा गरिएको छ । रोड्स नोभेम्बरको पहिलो साता नेपाल आउने पोखराले जनाएको छ ।
पोखराले यसअघिनै इन्डियन प्रिमियर लिग (आईपिएल)मा चेन्नई सुपर किङ्सको प्रतिनिधित्व गरिसकेका प्रशिक्षक समेत रहेका राजिव कुमारलाई मुख्य प्रशिक्षकमा नियुक्त गरिसकेको छ भने रिजन प्रजु प्रशिक्षकमा छन् ।
यस्तै पोखराको मार्कीमा नेपाल राष्ट्रिय क्रिकेट टोलीका ओपनर कुशल भुर्तेल रहेका छन् ।
पोखराले विदेशी खेलाडीमा अमेरिकन विकेटकिपर ब्याटर आन्द्रेस गौस, नेदरल्याण्ड्सका अलराउण्डर बास डी लेड र वेष्ट इन्डिजका बलर एण्डरसन फिलिपलाई अनुबन्ध गरिसकेको छ ।
नेपाल क्रिकेट संघ (क्यान) को आयोजनामा हुने एनपीएल मंसिर १५ देखि पुष ६ गतेसम्म हुनेछ । लिगमा ८ टोलीले प्रतिस्पर्धा गर्नेछन् ।
