। नोभेम्बर ५ मा अमेरिकामा राष्ट्रपतिय चुनाव हुँदैछ । यस चुनावमा डेमोक्रेटिक पार्टीबाट वर्तमान उपराष्ट्रपति समेत रहेकी कमला ह्यारिस र रिपब्लिकन पार्टीबाट पूर्वराष्ट्रपति डोनाल्ड ट्रम्प मैदानमा छन् ।
यी दुई उम्मेदवारलाई लिएर सिंगो अमेरिका विभाजित छ । सेलेव्रिटीले समेत आ-आफूलाई मनपर्ने उम्मेदवारलाई इन्डोर्स गरिरहेका छन् । निर्वाचनको मिति नजिकिँदै गर्दा थप कलाकार खुल्ने क्रम जारी छ ।
टेलर स्विफ्ट, बिली एलिस र एमिनेमजस्ता स्टारले यसअघि नै ह्यारिसको पक्षमा आफ्नो समर्थन जाहेर गरिसकेका छन् । समर्थनको यो क्रममा पपस्टार बियोन्से र हलिउड अभिनेता लियोनार्दो डिकाप्रियो समेत ह्यारिसको पक्षमा खुलेका छन् ।
ह्यारिसले टेक्सास राज्यको ह्युस्टनमा आयोजना गरेको चुनावी र्यालीमा पपस्टार बियोन्से पनि सहभागि भएर ह्यारिसको पक्षमा उभिइन् ।
‘म यहाँ सेलिब्रेटीको रूपमा होइन, म यहाँ राजनीतिज्ञको रूपमा पनि होइन । म यहाँ आमाको रूपमा उभिएकी छु’ बियोन्सेले ह्यारिसको लागि आयोजित चुनावी र्यालीमा भनिन् ।
‘एउटी आमा जसले मेरा बच्चा र हाम्रा सबै बच्चाहरु बस्ने संसारको गहिरो ख्याल राख्छिन्, एउटा यस्तो संसार जहाँ हामीसँग हाम्रो शरीरलाई नियन्त्रण गर्ने स्वतन्त्रता छ, एउटा संसार जहाँ हामी विभाजित छैनौं’ ह्युस्टनमा उनले भनिन् ।
‘हाम्री छोरीहरू बिना छत, कुनै सीमाहरू बिनाको सम्भावना देखेर हुर्किँदै गरेको कल्पना गर्नुहोस्’ उनले भनिन्, ‘हामीले भोट गर्नुपर्छ, र हामीलाई तपाई चाहिन्छ ।’
ह्युस्टन बियोन्सेको गृहनगर पनि हो । ह्यारिसको उक्त र्यालीमा सन् २०१६ मा रिलिज भएको बियोन्सेको गीत ‘फ्रिडम’ बजाइएको थियो । ह्यारिसले अघि सारेको ‘गर्भपतनको स्वतन्त्रता’लाई बियोन्सेले समर्थन गरेकी छन् ।
यसैबीच, हलिउड स्टार लियोनार्दो डिकाप्रियो पनि ह्यारिसको पक्षमा खुलेका छन् । इन्स्टाग्राममा पोष्ट गरिएको भिडियोमा अस्कर विजेता अभिनेताले हालै अमेरिकामा आएको आँधी हेलेन र मिल्टनको क्षतिको बारेमा चर्चा गर्दै भने, ‘यी प्रकोपहरू जलवायु परिवर्तनको कारणले भएको हो ।’
‘तर, डोनाल्ड ट्रम्पले तथ्यहरूलाई अस्वीकार गरिरहेका छन् । उनले विज्ञानलाई अस्वीकार गरिरहेका छन् । उनले पेरिस जलवायु सम्झौताबाट संयुक्त राज्य अमेरिकालाई फिर्ता बोलाए र महत्वपूर्ण वातावरणीय संरक्षणका मुद्दाबारे पछि हटाए’ डिकाप्रियोले भने ।
उनले भने, ‘जलवायु परिवर्तनले पृथ्वीलाई मार्दैछ र हाम्रो अर्थतन्त्रलाई बर्बाद गरिरहेको छ । हाम्रो अर्थतन्त्र, हाम्रो ग्रह र आफूलाई बचाउनको लागि हामीलाई साहसी कदम चाहिन्छ । त्यसैले म कमला ह्यारिसलाई भोट गर्दैछु ।’
