। ताजिकिस्तान र अफगानिस्तानविरुद्ध हुने मैत्रीपूर्ण खेलमा लागि नेपाली पुरुष राष्ट्रिय फुटबल टोली घोषणा भएको छ ।
अन्तरिम मुख्य प्रशिक्षक नवीन न्यौपानेले शुक्रबार घोषणा गरेको टोलीमा चार नयाँ खेलाडी समावेश भएका छन् । नेपालले यही नोभेम्र १३ देखि १९ को फिफा विन्डोमा ताजिकिस्तान र अफगानिस्तानसँग मैत्रीपूर्ण खेल खेल्न लागेको हो ।
नेपाल यू-२० राष्ट्रिय टिमका फरवार्ड निराजन धामीसहित डिफेण्डरहरु अभिषेक वाइवा, रणदिन पौडेल र अन्जन महर्जनले पहिलो पटक सिनियर टिममा स्थान बनाएका हुन् ।
निराजनले केही समयअघि घरेलु मैदानमा भएको साफ यू-२० च्याम्पियनसिपमा फाइनलसम्म पुर्याउन ३ गोल गरेका थिए । अभिषेकले पनि दुई वर्षअघि घरेलु मैदानमा भएको साफ यू-२० च्याम्पियनसिप खेलेका थिए । यस्तै रणदिपले पनि नेपालको उमेर समूहबाट खेलिसकेका छन् ।
यस्तै नेपालका लागि संयुक्त रुपमा कीर्तिमानी १३ गोल गरेका अन्जन विष्टले पनि टिममा पुनरागमन गरेका छन् । चोटका कारण अन्जनले जेठमा भएको फिफा विश्वकप २०२६ र एएफसी एसियन कप २०१७ को संयुक्त छनोट अन्तर्गत यूएई र यमनविरुद्धको खेल गुमाएका थिए । यस्तै गोलकिपर दिप कार्की, मिडफिल्डर एरिक विष्ट, रोहन कार्की, उत्सव राई र सुमित श्रेष्ठ पनि टिममा फर्किएका छन् ।
अनुभवी डिफेण्डर अनन्त तामाङसहित मिडफिल्ड लकेन लिम्बु भने चोटका कारण टिममा नरहेको प्रशिक्षक नविन न्यौपानेले जानकारी दिए ।
पछिल्लो पटक विश्वकप छनोट खेल्ने टिममा रहेका फरवार्डद्वय सन्जिव विष्ट र हिसुब थपलिया विदेश लागेका छन् । यस्तै विश्वकप छनोटमा पहिलो पटक राष्ट्रिय टिममा परेका आशिक बुब चौधरी र बसन्त जिम्बा यसपटक टिममा पर्न सकेनन् ।
गोलकिपर अभिषेक बराल, डिफेण्डर विशाल बस्नेत पनि टिममा अटाएनन् ।
पछिल्लोपटक विश्वकप छनोट खेलेका र अब हुने मैत्रीपूर्ण खेलका लाषि घोषित टिममा १० खेलाडी परिवर्तन भएका छन् ।
पछिल्लो समय नेपालमा लिग नहुँदा र खेलाडीहरु विदेश पलायन भइरहँदा राष्ट्रिय टिममा पनि कन्सिस्टेन्सी हुन सकेको छैन ।
प्रशिक्षक न्यौपानेले अहिलेको टिम युवा र अनुभवी खेलाडीको समिश्रण रहेको बताए । ‘सबैलाई थाहै छ । नेपालमा नियमित लिग नहुँदा धेरै खेलाडीहरु बाहिर गएका छन्,’ प्रशिक्षकक न्यौपानेले भने, ‘राष्ट्रिय टिमका पहिलाका खेलाडीहरु यू-२० टिम अनी बी र सी डिभिजन खेलेका नयाँ खेलाडीहरु बोलाएर एक हप्ताको प्रशिक्षण गरेपछि टिम घोषणा गरेको हो । मिश्रित टिम बनेको छ । युवा जोश छ ।’
पहिलोपटक नेपालको सिनियर टोलीको प्रशिक्षक सम्हालिरहेका न्यौपानेले दुई टिमसँगको मैत्रीपूर्ण खेल चुनौतीको रुपमा रहेको बताए । ‘मेरो लागि यो पहिलो पटक हो । ययसलाई मैले चुनौतीको रुपमा लिएको छु,’ उनले भने, ‘छोटो समयको तयारी छ । हामी भन्दा राम्रो टिमहरु छन् । सबैले मिहिनेत गरेर राम्रो खेल्ने लक्ष्य छ । राम्रो कम्बिनेसन बनाएर काउन्टर अट्याकमा केन्द्रित हुनेछौं ।’
नेपालको नोभेम्बरको फिफा विन्डोमा दुई मैत्रीपूर्ण खेल खेल्न लागेको हो । फिफा विन्डो नोभेम्बर १३ देखि १९ सम्म (कात्तिक २८-मंसिर ४ गते) रहेको छ । यही विन्डोमा नेपालले ताजिकिस्तान र अफगानिस्तान विरुद्ध खेल्न लागेको हो ।
नेपालले करिब पाँच महिनापछि अन्तर्राष्ट्रिय फुटबल खेल्न लागेको हो । पछिल्लोपटक विश्वकप छनोटअन्तर्गत नेपालले जेठमा यूएई र यमनसँग खेलेको थियो । यसअघि सेप्टेम्बर विन्डोमा नेपालले कुनै पनि अन्तर्राष्ट्रिय मैत्रीपूर्ण खेल खेलेन ।
२३ सदस्यीय नेपाली फुटबल टोली
गोलकिपर : किरण चेम्जोङ, दीप कार्की, विशाल सुनार,
डिफेण्डर : अभिषेक लिम्बु, विमल पाण्डे, छिरिङ लामा, रोहित चन्द, सनिश श्रेष्ठ, अभिषेक वाइवा, रणदिप पौडेल, अन्जन महर्जन
मिडफिल्डर : रोहन कार्की, मणिकुमार लामा, एरिक विष्ट, अरविन्द राई (आशिष),भरत खवास, उत्सव राई, मनिष डाँगी, आयुश घलान, सुमित श्रेष्ठ
फरवार्ड : जिलेस्पेजंग कार्की, अन्जन विष्ट, निराजन धामी
