— सब्स्टिच्युट ह्यारी विल्सनले इन्ज्युरी समयमा गरेको दुई गोलमा फुलहमले इंग्लिस प्रिमियर लिगमा ब्रेन्टफोर्डलाई २–१ ले पराजित गरेको छ । कारभेन कटेजमा भएको खेलमा ब्रेन्टफोर्डले पहिलो हाफमा अग्रता लिएको थियो ।
भिटाली जेनेल्टले २४ औं मिनेटमा गोल गरे । खेलले ९० मिनेट छुँदा ब्रेन्टफोर्ड जिततर्फ अग्रसर देखिएको थियो । तर विल्सनले इन्ज्युरी समयको दोस्रो मिनेटमा बराबरी गोल गरे । त्यसपछि इन्ज्युरी समयकै सातौं मिनेटमा दोस्रो गोल थपे ।
यससँगै फुहलमको नाटकीय जित पूरा भएको थियो । विल्सन खेल सकिन आठ मिनेट अगाडि मात्रै मैदानमा प्रवेश गरेका थिए र उनी नै खेलका निर्णायक सावित भए । यो जितपछि फुलहमको दस खेलबाट १५ अंक भएको छ र नवौं स्थानमा छ ।
ब्रेन्टफोर्ड भने समान १० खेलबाट १३ अंकमा १२ औं स्थानमा छ । यस सिजन जितको स्थितिबाट अंक गुमाउनेमा ब्रेन्टफोर्ड सबैभन्दा अगाडि रहेको छ ।
