— वीरेन्द्रनगरमा शुक्रबार भएको दुर्घटनाका मृतकका आफन्तहरुले प्रहरीको लापरबाहीका कारण दुर्घटना भएको भन्दै आन्दोलन थालेका छन् । उनीहरूले 'यो दुर्घटना हैन, हत्या हो' भन्दै प्रहरी प्रशासनको विरोध गरेका छन् ।
शुक्रबार रातानाग्लामा कर्णाली प्रदेश ०२००१ ख ०९९८ नम्बरको फोर्स गाडी दुर्घटना हुँदा चार जनाले ज्यान गुमाएका थिए ।
मृतकका आफन्तहरुले शनिबार विहान जिल्ला प्रहरी कार्यालय अगाडि विभिन्न मागहरू राखेर प्रदर्शन गरेका छन् । क्षमताभन्दा बढी यात्रु राख्दा समेत प्रहरीले वास्ता नगरेको र त्यहीकारण दुर्घटना निम्तिएको भन्दै उनीहरूको विरोध गरेका छन् ।
दुर्घटनामा परी दैलेखको भैरवी गाउँपालिका–५ का गाडी चालक ३८ वर्षीय सुरेश केसी, भैरवी गाउँपालिका–२ का ३६ वर्षीय कर्णबहादुर विष्ट, भैरवी गाउँपालिका–२ का १६ वर्षीय दीपिका महतारा र २१ वर्षीय संगीता विष्टको मृत्यु भएको थियो । दुर्घटनामा ३० जना घाइतेमध्ये ३ जनाको अवस्था गम्भीर छ ।
घाइतेहरूको प्रादेशिक अस्पतालमा उपचार भइरहेको छ ।
