— रुसले विश्वकै ठूला प्रविधि कम्पनीमध्ये एक, गुगललाई गणना गर्न र जम्मा गर्न सम्भवै नभएको राशीको जरिवाना तिर्नुपर्ने सजाय सुनाएको छ । गुगलले रुसलाई २ अंकको पछिल्तिर ३६ वटा शून्य हुने गरी गणना नै सम्भव नभएको रकम तिर्नुपर्ने विषय अहिले सामाजिक सञ्जाल र मिडियामा रोचक खबर बनेर छाइरहेको छ ।
गुगलले आफ्नो स्ट्रिमिङ प्लाटफर्म युट्युबमा रुसका केही च्यानलमा प्रतिबन्ध लगाइदिएको प्रतिकृयास्वरुप रुसले समग्र विश्वको कुल गार्हस्थ्य उत्पादनभन्दा पनि कयौं गुणा ठूलो रकम जरिवाना तोकिदिएको हो । रुसी राष्ट्रिय समाचार संस्था ‘तास’ का अनुसार यसअघि रुसी अदालतले गुगललाई ती युट्युब च्यानल रिस्टोर गर्न (प्रतिबन्ध हटाउन) वा तोकिएको जरिवाना तिर्न निर्देशन दिएको थियो ।
गुगलले सन् २०२२ देखि रुसी च्यानलहरू ब्लक गरेको हुनाले अदालतले प्रतिहप्ता दोब्बर दरले जरिवाना वृद्धि गर्दै २०,००,००,००,००,००,००,००,००,००,००,००,००,००,००,००,००,००० रुबल तिर्न भनेको हो । सीएनएनका अनुसार क्रेम्लिनका प्रवक्ता दिमित्री पेस्कोभले जरिवाना तोकेको पुष्टि गरेका थिए । उनले आफूले ‘उच्चारण नै गर्न नसक्ने अंक’ जरिवाना लगाइएको र यो अथाह राशी ‘सांकेतिक’ भएको बताएका छन् । ‘गुगलले हाम्रा प्रसारकहरूको क्रियाकलापलाई आफ्नो प्लाटफर्ममा प्रतिबन्ध लगाउन मिल्दैन,’ पेस्कोभले सीएनएनसँग भनेका छन् ।
गुगलले चाहिँ यो घटनालाई रुसमा आफ्नो व्यवसायसम्बन्धी ‘जारी कानुनी लडाइँ’ को संज्ञा दिएको छ । ‘युट्युबमा प्रतिबन्ध लगाइएका केही एकाउन्टहरूको विषयलाई लिएर हामीमाथि एकदमै ठूलो जरिवाना लगाउने व्यहोराको देवानी फैसला आएको छ,’ गुगलको प्रतिकृया छ, ‘तर अहिले जारी सो कानुनी प्रक्रियाले हामीलाई वित्तीय वा अन्य रूपमा कुनै प्रभाव पार्छ भन्ने हामीलाई लाग्दैन ।’
युक्रेनमाथि रुसद्वारा आक्रमण सुरु भएयता गुगलले अन्य अमेरिकी प्रविधि कम्पनीहरूले झैँ रुसमा आफ्नो गतिविधि घटाउँदै लगे पनि पूर्ण रूपमा बन्द भने गरेको छैन । गुगलको सर्च र युट्युब सेवा अझै पनि रुसमा उपलब्ध छ । रुस-युक्रेन युद्ध सुरु भएको केही समयमकै रुसी सरकारले गुगलको स्थानीय साझेदारको बैंक खाता रोक्का गरिदिएपछि सो कम्पनीले टाट पल्टिएको घोषणा गर्दै आफ्ना अधिकांश व्यावसायिक गतिविधि स्थगित गरेको थियो ।
