— प्रमुख प्रतिपक्षी दल माओवादी केन्द्रका अध्यक्ष पुष्पकमल दाहालले एमाले र कांग्रेस गठबन्धनको सरकारले १०० दिनमा जनतालाई राहत पुग्ने कुनै पनि काम नगरेको बताएका छन् । माओवादी केन्द्र नेतृत्वको सरकारले गरेका काम समेटेर प्रधानमन्त्री केपी शर्मा ओलीले १०० दिनको वक्तव्य दिएको दाहालको दाबी थियो ।
थाहा नगरपालिका, मकवानपुरमा शनिबार आयोजित पार्टीको कार्यक्रमलाई शनिबार सम्बोधन गर्दै पूर्वप्रधानमन्त्री दाहालले वर्तमान सरकार काम गर्न असफल भएको भन्दै आलोचना गरेका हुन् । पुराना संसदीय दलहरू कांग्रेस र एमालेले जालझेल गरेको तर काम भने नगरेको उनको भनाइ थियो ।
माओवादी केन्द्रको सरकारले गरेका कामको चर्चा गर्न नसकेको पनि दाहालको भनाइ थियो । 'हामीले धेरै राम्रो काम गरे पनि जनतामा यो-यो राम्रो काम गर्यौं भन्ने स्थापित गर्न अलि सकेनौं । उनीहरूले नगरेका काम पनि, अहिले तपाईंहरूले १०० दिनको उपलब्धिमा प्रधानमन्त्री केपी ओलीले पढेको वक्तव्य सुन्नुभएको होला, मैले गरेका जति काम आफूले गरेको बनाएछन् । उनले त यहाँ आएपछि सिन्को भाँचेका छैनन् । १०० दिनमा गरेको भनेर फेहरिस्त जे पेस गरेका छन् त्यो माओवादी नेतृत्वको सरकारले गरेका कामहरूको लिस्ट बनाएछन् र यो मैले गरेको भने,' दाहालले भने ।
दाहालले आफ्नो नेतृत्वको सरकारले भारत र चीनसँगको सम्बन्धलाई नयाँ उचाइमा पुर्याएको बताए । भारत र चीनसँग नेपालको हितमा महत्त्वपूर्ण र दूरगामी सहमति र सम्झौता भएका पनि उनले दोहोर्याए । विश्वमञ्चहरूमा नेपाल र नेपाली जनताको हक र अधिकारको लागि कुरा राखिएको उनको भनाइ थियो । संयुक्त राष्ट्रसंघदेखि अन्य अन्तर्राष्ट्रिय मञ्चहरूमा नेपालको जलवायु परिवर्तनबाट पर्ने प्रभावलगायतका विषयमा प्रभावकारी कुरा राखेको उनले बताए ।
आफ्नो नेतृत्वमा सरकार हुँदा धेरैका सेटिङ भत्काएकोले ती बिचौलिया, पुँजीपतिले एमाले र कांग्रेसको सरकार रातारात गठन गरेको दाहालको भनाइ थियो । 'मलाई शेरबहादुर देउवाजी र केपी शर्मा ओलीजीले बुद्धि निकालेर सरकार बनाएको भन्ने लाग्दैन,' दाहालले भने । वर्तमान सरकार राजनीतिक रूपमा भन्दा पनि अरु नै कारणले गठन भएको दाहालको भनाइ थियो । दिनदिनै सरकारप्रति जनतामा असन्तुष्टि, आवेग र आक्रोश बढ्दै गएको पनि उनले भने ।
काठमाडौं उपत्यका लगायतका जिल्लामा पछिल्लो पटक आएको बाढी, डुबान र पहिरोबाट जनता प्रभावित र पीडित भएपछि सरकार छ कि छैन भन्ने अवस्था सिर्जना भएको दाहालको भनाइ थियो । आफू पीडित जनताकोमा जाँदा सरकार अनुपस्थित देखेपछि सर्वदलीय बैठक आह्वान गरेको दाहालले बताए । 'मैले सर्वदलीय बैठक बोलाए, बोलाउनुपर्थ्यो सरकारले । सरकारले त्यो वास्ता नगरेपछि मैले बोलाए । मैले सर्वदलीय बैठक बोलाएको ३ घण्टापछि सरकारले बोलाउन बाध्य भयो,' उनले भने, 'हामीले गर्न खोजेका राम्रा कामहरूको परिणाम र अहिलेको सरकारले गरेका नराम्रा कामहरूको परिणामबारे अहिले जनताले नयाँ विकल्पतिर सोच्न थालेको महसुस गर्छु ।'
दाहालले माओवादी केन्द्रले महिला, दलित, आदिवासी, मधेसी, जनजाती, थारुलाई अधिकार सम्पन्न गर्न खेलेको भूमिकालाई लिएर सकारात्मक रूपमा हेरेको बताए ।
माओवादी केन्द्रले ७५३ स्थानीय तहमा खबरदारी सभा गर्ने तयारी गरिरहको पनि दाहालले जानकारी दिए । उनले मेची-महाकाली अभियान चलाउन लागेको पनि बताए । उनले राजनीतिक स्थिरिताका लागि प्रत्यक्ष निर्वाचित राष्ट्रपतिको नारासहित आफू देशव्यापी अभियानमा जान लागेको बताए ।
माओवादी र अन्य राजनीतिक दल एकै नभएको दाहालको भनाइ थियो । कांग्रेस-एमाले र माओवादी उस्तै-उस्तै नभएको दाहालको भनाइ थियो । 'नेपालमा गणतन्त्र सम्भव छैन भनेर बयलगाडाको सिद्धान्त ल्याउने र गणतन्त्र नल्याइ छोडिँदैन भनेर हजारौंको बलिदान दिने उस्तै-उस्तै हुन् त ?, हुँदै होइनन्,' दाहालले भने । माओवादी केन्द्रले विगतमा एमाले र कांग्रेससँग सत्ता सहकार्य गरेकोमा आत्मसमीक्षा गरिरहेको दाहालले बताए ।
आफूले पहिलोपटक प्रधानमन्त्री हुँदा ३० हजारसम्मको ऋण मिनाहा गरेर जनतालाई राहत दिएको र दोस्रो पटकमा उज्यालो नेपालको अवधारणा अनुरूप लोडसेडिङ अन्त्य गरेको दाहालको भनाइ थियो ।
