— नेपाल क्रिकेट संघ (क्यान) ले आयोजना गर्न लागेको नेपाल प्रिमियर लिग (एनपीएल) सम्बन्धमा परेको रिट निवेदनमा अन्तरिम आदेश जारी गर्न सर्वोच्च अदालतले अस्वीकार गरेको छ ।
सर्वोच्च अदालतका न्यायाधीश हरिप्रसाद फुयाँलाको इजलासले एनपीएलसम्बन्धमा दायर रिट निवेदनमाथि आइतबार सुनुवाइ गर्दै अन्तरिम आदेश जारी गर्न अस्वीकार गरेको हो ।
एनपीएलबारे क्यानविरुद्ध जोरा स्पोर्टस म्यानेजमेन्ट प्रालिको तर्फबाट आमीर अख्तरले रिट निवेदन दायर गरेका थिए । जसमा क्यान र क्यानको केन्द्रीय समितिलाई विपक्षी बनाइएको थियो ।
अख्तरले एनपीएलको फ्रेन्चाइज १० वर्षका लागि आफूसँग रहेकोले क्यानले एनपीएल आयोजना गर्न नसक्ने दाबी गरेका थिए ।
अन्तरिम आदेश जारी नहुने आदेशसँगै उक्त रिट निवेदनमा लिखित कारण पेस गर्न भनिएको छ ।
क्यानको आयोजनामा आगामी मंसिर १५ देखि काठमाडौंमा एनपीएल हुँदैछ । एनपीएलमा ८ फ्रेन्चाइज टोलीले प्रतिस्पर्धा गर्दैछन् ।
